Parlamentario di MAS ta cuestiona minister di Enseñansa tocante inspector nobo

Parlamentario di partido MAS, Aquannette Gunn par di dia pasa a manda un cantidad di pregunta dirigi na minister di Enseñansa y Deporte, Endy Croes tocante varios desaroyo den Enseñansa, por ehemplo den Departamento di Inspeccion di Enseñansa Aruba.

Den esaki, parlamentario Gunn a señala cu durante reunion di tratamento di presupuesto 2023, Minister Croes a indica cu aumento di personal den Departamento di Inspeccion di Enseñansa Aruba ta debi na entre otro cu entrante e aña aki ta bay nombra un inspector mas reforsa e departamento aki. E fraccion mediante e solicitud ta puntra si e vacatura di e persona aki a cana e procedura di solicitud, ya cu nan como fraccion “a haya cierto informacion di fuentenan fidedigno cu esaki ta un persona cu ta hopi liga na minister y cu e persona a keda apunta pa ocupa dicho funcion sin cu a encamina e procedura di seleccion. Tampoco tabatin un aviso di solicitud pa e personanan cu tabata interesa pa ocupa dicho funcion,” e documento ta indica.

Igualmente a trece dilanti cu minister Croes su coordinador di nomber Ivan Croes (candidato di RAIZ) mester a entrega su carta di retiro na dunado di trabao pa por bin den servicio di minister. Door cu su ex-dunado di trabao no a bay di acuerdo pa aproba su ‘buiten vrijstelling van dienst-BVVD, ta bin dilanti e pregunta si Ivan Croes ta fungi ainda como coordinado di minister? Si e contesta ta no, den ki periodo Ivan Croes tabata den su servicio?

Tin rumornan fuerte cu Ivan Croes ta esun cu lo ta bay keda apunta como inspector nobo di Departamento di Inspeccion di Enseñansa, y relaciona cu esaki, ta solicita na e minister si por confirma esaki y ki proceso di seleccion a aplica pa e persona aki.

Den mesun rosea, ta bin dilanti e pregunta si Ivan Croes a ricibi su Landsbesluit y si por comparti esaki cu Parlamento y cu pueblo di Aruba den cuadro di transparencia, pa motibo cu segun e documento ta sigura, “den cuadro di spirito di transparencia y integridad cu tanto e gobierno ta clama ta laga un bes mas e sabor amargo si ta berdad cu minister Croes a djis ‘handpick’ of privilegia un persona pa ocupa e funcion aki.”