Recientemente, parlamentario di MAS, Marisol Tromp a comparti riba su pagina di Facebook un video den cual e ta cuestiona maneho di minister di Labor y Integracion, Glenbert Croes.

E video ta cuminsa mustrando imagennan di noticia tocante un caso di un persona cu Guarda Nos Costa tabata cla pa deporta, pero minister di Labor y Integracion, Glenbert Croes a firma pa lag’e den libertad. Ta parce di trata di e caso di Ariel Lopez.

Na februari di 2022, un caso specifico a keda conoci ora un persona di nacionalidad Dominicano a wordo laga den libertad for di Guarda Nos Costa cu un permiso unda cu e funcionario publico Mario Wever ta firma un VTA pa e persona en cuestion. E tempo aya, minister di Integracion, Labor y Energia, Glenbert Croes a ofrece un conferencia di prensa pa asina duna mas claridad tocante e caso aki, ademas di duna informacion tocante maneho di admision y di integracion.

Lopez a bira conoci na momento cu e website 24ora a informa cu trahadonan di Guarda Nos Costa (GNC) a pone nan trabao plat pa motibo di salida di Lopez cu un VTA otorga pa DIMAS, despues cu e tabata deteni na GNC. Segun Croes, Lopez a pidi permiso como personal domestico, cual a keda nenga despues di apelacion. Alabes, e persona aki tabata mantene un relacion sentimental cu Rossana Miguelina Groeneveldt, naci na Aruba, y for di e relacion aki a nace un yiu, unda cu mester haci proceso di establece paternidad via test di DNA. Mas o menos mesun temporada cu ta entrega e peticion pa gezamenlijk gezag na Corte, Lopez ta wordo deteni door di GNC, pasobra durante un control di trafico ta resulta cu e no tin status legal. Pero door di pasa pa diferente proceso, el a logra entrega un peticion pa un permiso di estadia a base di ‘bijzondere band met Aruba’.

Den esaki, Croes a menciona cu maneho di admision y integracion di Pais Aruba ta wordo determina door di gobierno, specificamente door di minister encarga cu Integracion. Cu esaki den consideracion a reactiva un comision di conseho di Admision y deportacion: Adviescommissie Toelating en Uitzetting (ATU).

Despues a determina cu Lopez a cana e proceso completo debidamente, a entrega su peticion na DIMAS pa un permiso, a cumpli cu tur e rekisitonan pa cu e peticion aki segun e maneho vigente, y ta bin na remarca pa un permiso di estadia di acuerdo cu e maneho existente di Admision y Integracion, pa cual motibo a bay over na honra su peticion, segun Croes a declara e tempo ey.

Den e video di parlamentario Tromp, e ta bisa: “Riba dje, nos tin un prome minister di pais Aruba, Evelyn Wever-Croes, cu ta sostene e maneho aki tambe…U’n ta nada, minister Glenbert ta firma toch.”

El a continua bisando cu “na e momento aki, enfoke ta puramente riba legalisa cosnan ilegal,” mientras ta mustra video di prome minister splicando cu yega como turista y “overstay” no lo conta contra legalisa e situacion di un inmigrante, y cu mayoria di persona indocumenta na Aruba a yega legalmente como turista pero a surpasa nan estadia.

“Bin cu como turista y nos ta legalisa tur cos pa bo. Keda numa, no coy bo vuelo back. Keda Aruba anto bo ta keda traha ‘kinan,” Tromp ta comenta. Esaki sigui pa clips di minister Croes splicando e proceso pa regularisacion di indocumentadonan. “Minister president Evelyn Wever-Croes ta haci un invitacion na turistanan pa bin traha na Aruba,” Tromp ta continua.

“Bin cu nombernan manera Alternative Legal Pathway, pa legalisa cosnan ilegal? Ki dia bo a bin cu un pathway pa studiantenan bin back Aruba? Ki dia bo a defini un pathway pa nan por haya un trabao caminda cu nan por usa nan skills nan conocemento, nan diplomanan y bin traha back na nan pais natal?” el a cuestiona. Tromp ta critica cu no tin un maneho special pa e studiantenan aki. “Puntra cual di e studiantenan tin gana di bolbe ora nan mira e desasternan aki cu ta tuma lugar.”

Tromp ta continua bisando cu e maneho aki ta “premia ilegalidad.”
“Propaganda e ta haciendo pa hende bin di afo. Aworaki, ta un ‘free for all’ tin door di minister Glenbert Croes, sosteni pa prome minister Evelyn Wever-Croes.”

“Gruponan ta drenta, supuesto profesional, caminda cu minister Glenbert Croes ta firma, ta aproba esaki, y ta bisa ‘tin un oportunidad pa Aruba mirando e scarsedad di trahador cu tin, cu tur hende cu ta fisicamente na Aruba caba, of si bo ta ilegal, bo ta fit den e politica di integracion’”, Tromp ta continua, citando Croes. “Drenta numa. Anto bo ta wak un lista di hende – ora bo wak nan edad, bo no ta mira ni nan profesion, kico ta loke nan ta bin haci profesionalmente – bo ta wak edad di muchanan di 19 aña, supuesto profesional cu ta bin traha na Aruba. Y na mes momento bo ta wak tambe cu ta firma y bisa di antemano caba na e companianan aki, e ta priminti nan, sigura nan, cu e departamentonan cu ta cay bao dje, esta Dimas, DPL, tur esnan cu ta importante den e procesonan aki, cu nan lo coopera tur cu tin cu nan, sin sa si nan ta bay cumpli cu tur e rekisitonan cu ta rekeri pa ley aki na Aruba.” Entre e rekisitonan, ta destaca cu mester no tin antecedente penal, pa loke Tromp ta cuestiona ken ta controla si e personanan en cuestion tin antecedente penal of no.

“Cuanto hende mas nos por carga? Cuanto hende mas nos por tuma?” Tromp ta cuestiona. “Unda nan ta bay biba? Ya caba tin un problema cu DIP ta stanca, FCCA no ta trahando casnan social, y asina mes gobierno ta sigui yena e pais sin tin un maneho responsable pa cu e consecuencianan di mas hende bibando na Aruba.”

Pa finalisa, e ta referi na e mocion di desconfiansa cu a presenta den Parlamento contra Croes. “Lamentablemente e no a carga un mayoria den Parlamento, pero tur esnan cu a vota p’e y sosten’e por sa cu tempo lo mustra cu e mocion aki ta hustifica.”