E siman aki a sali pa Den Haag, Hulanda e parlamentarionan di Partido di Pueblo Aruba (AVP), como parti di e delegacion di Parlamento di Aruba. Firme den nan meta pa saca e maximo probecho di e Encuentro Interparlamentario di Reino (IPKO), drs. Mervin Wyatt-Ras y Mike de Meza a participa den e Tripartiet diaranson caminda Aruba, Corsou y St. Maarten ta prepara su puntonan prome cu sinta cu Hulanda.

Parlamentario Wyatt-Ras a haya e impresion cu tur delegacion tin e intencion di traha hunto; al menos asina a keda expresa pa e diferente presidente parlamento. Geschillenregeling ta entre e puntonan di mas importante y tambe pa e echo cu tin tanto tempo trahando riba dje.

Riba esaki, colega Mike de Meza a splica cu Corsou y St. Maarten a dicidi pa adopta e cambionan den e proposicion di Aruba. A palabra cu awo parlamento di cada pais lo mester trat’e, mand’e pa nan respectivo Gobierno y consecuentemente pa Rijksministerraad, a traves di e Ministernan Plenipotenciario.

Otro punto importante di discusion durante e tripartiet tabata enseñansa, specificamente e dificultad cu studiantenan di Caribe Hulandes tin pa haya vivienda, pa habri cuenta di banco, etc. E delegacionnan kier traha riba esey, ademas di otro cooperacion pa beneficia enseñanza na nan mesun pais.

Banda di esey, tin tambe e aspecto di pasado di sclavitud pa cual Hulanda, manera ta conoci, a pidi disculpa mas tin cu papia ainda encuanto mentalidad y mas bos di e islanan den e decisionnan cu tin pa bay tuma awo, asina Parlamentario Wyatt-Ras a indica.

De Meza a menciona tambe e retonan di conectividad, kier men e prijs caro pa biaha entre Aruba, Corsou y St. Maarten, pero tambe Saba. St. Eustatius y Boneiro. “E gasto ta sumamente halto y mester wak con por stimula e gobiernonan pa yega na otro hunto cu Hulanda riba esaki y busca manera di bin cu alternativa mas accesibel. E tin un caracter social economico,” segun de Meza.

El a duna como ehempel e rebaho cu Francia ta duna na transporte entre su colonianan. E ta kere cu esey mester conta tambe pa Reino Hulandes. A palabra den e tripartiet cu pa prome cu fin di aña 2023 lo tin un conferencia entre islanan pa invita experto duna presentacion, haci analisis y bin cu sugerencia cu ta cumpli cu leynan internacional y ta resulta den rebaho pa habitante di e islanan di Reino Hulandes.

Wyatt-Ras ta kere cu, contrario na loke president di Parlamento di Aruba, mr. Edgard Vroijlk a papia di dje den su discurso, tin mester di mas union na Aruba. “Nos tin hopi huiswerk pa haci pa combati e democratisch deficit cu tin na Aruba mes y den nos parlamento. Gobierno mester duna nos mas informacion y mester tin mas transparencia na nos pais y asina por contribui mas na e diferente ley cu ta trata.”

E Interparlamentaire Koninkrijks Overleg ta cuminsa diahuebs y ta finalisa diasabra. Otro topiconan cu Hulanda, Aruba, Corsou y St. Maarten lo discuti riba dje ta inclui proteccion di data personal, cambio di clima y energia alternativo.