Par di dia pasa un medio di comunicacion local a reporta un caso di discriminacion cu a tuma luga na sede di gobierno, esta Cocolishi, ora dos hoben di religion musulman cu tabata usando nan hijab tabata conforma un grupo di 31 studiante di Haagse Hoge School di Hulanda e cual mester a reuni cu prome minister Evelyn Wever-Croes y minister di Enseñansa y Deporte Endy Croes.

Pero a bira conoci, cu e dos studiante aki no a logra yega na dicho reunion pa motibo cu un persona a duna ordo pa nan no drenta edificio debi cu nan tabata bisti un hijab, lo cual a causa un malcontento, desapunto y a ser tuma como ofensa pa e otro studiantenan y personanan cu tabata acompaña nan.

E grupo di studiante di Hulanda tambe a bay Corsou y despues nan a bin Aruba debi cu nan ta studia Politica unda cu nan kier a compronde mas di e sistema politico y di e actornan politico, p’esey nan a pidi pa papia tambe cu oposicion y cu gobierno unda tabatin preguntanan tocante e rijkswet, COHO y con e diferente politico di partidonan ta para, como tambe kico personalmente politiconan ta pensa tocante abolicion y disculpa pa sclavitud, con nan ta experiencia e ambiente politico.

Redactor di Bon Dia Aruba a tuma contacto cu parlamentario Mansur e cual a splica cu nan como parlamentario no a haya informacion di e incidente aki y cu por a compronde, segun el a sigura, cu tabatin cierto discusion na Hulanda y Corsou tocante e situacion aki na unda ta bin dilanti e pregunta dicon ta existi discriminacion na Aruba? “nunca mi lo a imagina cu studiantenan aki lo ta victima di dje y experienci’e di e forma ey den un edificio di gobierno,” el a sigura.

Articulo 1 di Constitucion di Aruba e cual a ser aproba unanimamente dia 9 di augustus di 195 ta indica cu “tur persona na Aruba ta ser trata igual den casonan igual. Discriminacion pa motibo di religion, creencia, afiliacion politico rasa, sexo, color, lenguahe, origen nacional of social, pertenencia na un minoria nacional, poder economico, nacemento of pa cualkier otro motibo no ta permiti.”

Mansur ta di opinion cu esaki ta un oportunidad perdi pa e studiantenan y cu Aruba mester haci miho, “mi ta kere un disculpa oficial di gobierno pa studiantenan di Haagse Hoge School ta na su luga y tambe mester bin algun training pa empleadonan den edificionan publico cu obviamente no tabata na haltura of mi no sa exactamente kico a bay fout y esey tambe mi ta puntra prome minister den e preguntanan cu a dirigi na su persona pa contesta den parlamento, kico a bay fout y kico nos ta haciendo pa cambiel’e? si mester di training pa sensibilidad cultural of religioso pa miembronan di siguridad di edificio publico of kico mester sucede? Pa e cos aki nunca mas lo bolbe ripiti pasobra nos isla ta biba di turismo, e grandeza di su pueblo ta su gran cordialidad y desafortunadamente studiantenan aki no a experiencia esey,” Mansur a señala.

Tambe el a trece dilanti e preocupacion di e imagen cu nan por hiba di Aruba cu ta unico negativo den cual el a sigura cu “mi no kier pa nan bisa cu esey ta actitud di tur politico na nos pais, mi ta spera cu gobierno eherce curashi y emiti un disculpa oficial tanto pa studiantenan como pa e scol.”

Den e preguntanan cu Mansur ta haci na prome minister si e ta considera importante pa bin cu un campaña di conscientisacion pa empleadonan publico y pueblo en general, ya cu den comunidad di Aruba tin miembronan cu ta di religion Musulman y nan ta bisti e hijab, igualmente otro turistanan cu ta bin for di otro paisnan tambe ta ser bisti di e mesun manera, “esey no ta algo cu no ta comun, e no ta algo cu nunca a ser mira na Aruba y p’esey mas cu tur cos, ma hay’e e proyeccion hopi straño, pasobra e no ta un novedad pa nos pais,” el a sigura.

Igualmente, Mansur a puntra ki pasonan a ser tuma contra e persona cu a ocasiona e problema? Si por splica con empleadonan publico ta ser educa cu nan prehuicio personal nunca por ser eherce durante nan funcion y si prome minister finalmente a reuni cu studiantenan afecta y a pidi disculpa?

“Division y argumento no ta crea cos bon pa nos pais”

Discriminacion ta un palabra cu den ultimo dianan aki ta hopi scucha den comunidad, no solamente pa esaki sino tambe pa loke ta trata e matrimonio igualitario unda diferente fundacion a bin dilanti cu nan pensamento pa e topico controversial aki na unda hasta firmanan ta colecta pa asina Gobierno di Aruba bay casacion pa trek e decision cu HOF a tuma dia 6 di december ultimo.

Di esaki, Gobierno di Aruba a señala na december ultimo cu nan a manda pidi un conseho huridico tocante e decision si mester bay casacion of no caminda Mansur a declara cu nan ta spera cu e conseho lo ser comparti cu parlamento y cu gobierno lo actua a base di sentido comun, “mi ta compronde si cu den ministerraad no tin un mayoria pa bay casacion, e dos minister di Raiz ta contra y por lo menos 4 minister mas personalmente no ta na fabor di bay Casacion, politicamente ta un diferente asunto y den parlamento mi ta kere cu e mayoria tampoco kier pa bay casacion, e ta un balans delicado pa gobierno y pa partidonan politico, di mi parti mi ta spera pa no bay casacion pasobra e division y argumento no ta crea cos bon pa nos pais,” el a finalisa.