Parlamentario Dellanire Maduro(POR): ‘Mester sigura cu no lo tin lista di espera atrobe despues di e Sociaal Crisis Plan’

Comentando riba e importancia di e Sociaal Crisis Plan, lider di fraccion di POR, Dellanire Maduro ta bisa cu esaki a wordo introduci despues di e suceso lamentabel cu a tuma luga na november 2017.

E crisis social na Aruba no ta algo recien, manera a wordo trece dilanti den documento traha na december 2017 pa Departamento di Asuntonan Social, unda ta menciona cu e crecemento di nos sector economico di turismo y otro sectornan manera hotelnan, restaurantnan a trece su efecto positivo pa pais Aruba. Di otro banda, esaki tambe a trece duplicacion di nos populacion, migrantenan etc. cu na su bes a trece cune cu tereno di enseñansa, social, Vivienda y cuido a keda deficiente di un maneho social adecua. E impacto social di e crecemento economico y crecemento di nos populacion a trece cune un efecto social negativo pa nos sociedad. Un desbalance social grave riba nos isla.

Ademas di esaki e sectornan di asuntonan social nan capacidad no a crece den e transcurso aki, mas bien locual a tuma luga ta cu e sector social a wordo confronta cu den pasado a corta den nan.

Bisando esaki, parlamentario Maduro a expresa cu e ta contento cu nos tin un Sociaal Crisis Plan na e momentonan aki. E plan aki ta un temporario, e tin un duracion te 31 di december 2021, e esencia ta pa “haal in” e lista di espera, pa por actua di forma preventivo, represivo y curativo.

A involucra diferente instancia pa por ehecuta diferente proyecto. Pa por atende cu e lista di espera debidamente e plan ta inclui innovacion di diferente sistema di registro, entre otro, pa mehora e comunicacion entre instancianan y busca profesionalnan di e area pa reduci e lista di espera. Unabes cu yega 31 di december 2021 e plan lo yega su final y e profesionalnan aki lo no t’ey mas. E situacion aki lo por trece cune cu lo bolbe crea un lista di espera cu ta algo cu mester wordo preveni. Unabes cu reduci e lista di espera, haal in e trabounan cu a keda pendiente e cantidad di personal necesario lo no ta mes un cantidad pero tampoco por bay bek na con e tabata prome cu a introduci e Integral Sociaal Crisis Plan.

Di e forma aki por percura cu nos comunidad ta keda cu acceso na personanan cu experticio den sector social despues di e sociaal crisis plan. Teniendo na cuenta esaki, Dellanire Maduro a presenta un mocion durante reunion publico di Parlamento cu a atende e tema di presupuesto di Sociaal Crisis Plan.

E mocion ta bisa: Considerando: – Cu den pasado a corta den presupuesto di sector di asunto social; – Cu e crecemento di nos economia y crecemento di nos populacion a trece un impacto social negativo debi cu e capacidad di sector social no a crece conhuntamente cu e sector economico; – Cu e capacidad di sector social no a crece cu e añanan, a crea deficiencia riba diferente tereno; – Cu e social crisis plan ta un programa “temporario” pa “haal in” e lista di espera; – Cu e personal di profesionalnan cu a wordo busca pa reduci e lista di espera ta uno temporario cu lo termina 2021 y no lo t’ey mas pa duna e servicio ni sosten despues di e periodo aki; – Cu kier preveni pa un lista di espera bolbe forma unabes cu finalisa e social crisis plan; Ta dicidi: Di urgi gobierno pa bin cu un plan structura pa inventarisa cua profesionalnan lo ta indispensabel y lo mester di nan a largo plazo, (despues di e SCP) pa e tereno social por keda funciona debidamente y keda traha na e metanan social.

Lider di Fraccion di POR ta gradici su coleganan parlamentario cu a sostene e mocion aki, cual ta uno cu tin un miho futuro di nos pais como meta.