Diahuebs ultimo Parlamento a trata e tema di Citgo y contrario na loke ta e recomendacionnan no solamente local, pero mundial, di distanciamento social, e reunion a tuma luga cu tur esnan presente den sala. Esaki a tuma luga debi na fraccion di AVP, cu no a colabora pa logra unanimidad pa realisa e reunion manera e otro 3 reunionnan anterior.
Dellanire Maduro como lider di fraccion di POR a lamenta cu no por a conta cu sosten unanime pa hiba e reunion di un forma ehemplar pa nos comunidad. E ta considera cu no tabatin mester di hiba e reunion di e forma aki cu persona den sala, poniendo tur persona den riesgo.
Papiando riba un topico specifico y cu ta hopi relaciona cu e refineria, Maduro a indica cu e como e parlamentario mas hoben den sala ta considera cu tur loke a pasa den pasado lamentablemente no por wordo cambia y nos medio ambiente a wordo perhudica. El a recorda cu na 2016 gobierno di e tempo ey a exonera Valero di nan responsabilidad pa cu daño na medio ambiente. “Nos no por lubida cu e daño haci na nos medio ambiente (aire,tera,awa) incluyendo nos salud”.
Pero manera el a bisa, no por cambia pasado y awo e pregunta cu nos tur tin cu haci nos mes ta “kico nos ta bay haci awo? Kico nos ta bay haci e aña aki y den futuro cercano pa diversifica nos economia, kico nos ta bay laga atras pa siguiente generacionnan, no lo ta bunita pa wordo recorda cu nos a cambia e rumbo di nos economia? Bisando esaki, gobierno hunto cu comunidad y stakeholder mester bin cu oportunidad y posibilidadnan realistico pa pais Aruba!”, Dellanire a expresa.
E ta considera cu e vision pa futuro mester ta innovativo teniendo na cuenta medio ambiente, cambio climatico y e metanan di SDG’s (Sustainable Development Goals). Tambe ta bisa cu nos mester keda habri pa explora e diferente alternativanan y posibilidadnan cu por tin y cu no por pensa manera 20 of 30 aña pasa. Teniendo na cuenta e puntonan aki, e crisis actual ta brindando nos e oportunidad pa adapta.
