Lider di Fraccion di POR den Parlamento, Dellanire Maduro ta satisfecho cu e anuncio haci door di Minister di Salubridad relaciona cu e consehonan di Raad van Advies pa loke ta (landsbesluit/decreto) Arubig, cual segun e mandatario tabata bastante positivo.
Partido POR den su programa a pone enfasis riba e parti di bin cu e reconocemento di nos dokternan cu a studia den e region y e importancia pa tin un tipo di registracion tipo BIG pa Aruba. E punto aki a wordo incorpora tambe den e programa di gobernacion Hunto pa Aruba di Gabinete Wever-Croes.
Dellanire Maduro tabatin e honor di por a forma parti di e comision cu a traha riba e posibilidadnan di ampliacion di e ley Arubig y ta contento di por mira cu finalmente por tin avance pa yega na e meta final, esta di por permiti nos dokternan yiu di tera cu a studia den e region por bin na remarke pa traha na nan propio pais manera debe ser.
Di e manera aki ta contribui tambe na logra cu nos yiunan di tera por sigui specialisa nan mes den e region sin cu tin mester di hacie na Hulanda, habriendo espacio pa na nos isla nos por conta cu mas specialistanan riba diferente area. E punto aki tin hopi aspectonan positivo, entre otro por menciona, un cuido specialisa riba nos propio isla, evita gastonan personal of di AZV pa bay busca cuido den exterior, turismo medico pa nos isla y mas potencial pa sigui crece den e ramo medico den e region.
Dellanire Maduro ta spera cu e trabou continua pa asina e otro profesionalnan den e ramo di salud por wordo reconoci, manera por ehempel e dentistanan. For di Parlamento Maduro lo sigui e desaroyo aki di cerca unda nos profesionalnan medico y nos comunidad en general ta esnan cu lo mester wordo beneficia cu e cambionan aki.
