Recientemente lider di Fraccion di POR, Dellanire Maduro den su calidad di Presidente di e Comision Fiho di Parlamento pa Asuntonan Social, Cuido pa nos Grandinan, Famia y Salubridad Publico, hunto cu 2 miembro mas di e comision y Presidente di Parlamento tabata presente durante apertura di e localidad nobo di e poli di Respaldo. 

Durante e apertura 3 pashent femenino di Respaldo cu diferente padecemento mental, edad y nacionalidad a comparti nan testimonio, con e echo di por tin acceso na cuido medico por cambia por completa e bida di un persona.

Un di e pashentnan di respaldo, Jasmine Geerman di 17 aña di edad a trece dilanti cu danki na atencion medico cu e ta hayando e por a duna un discurso dilanti publico. Jasmine actualmente ta representante di ‘SDG young voices Aruba’. No tin nada mas satisfactorio cu mira un pashent progresa. Manera Jasmine a señala, segun ‘Organisacion Mundial di Salud’ 1 di cada 4 persona lo wordo afecta door di trastorno mental of trastorno neurologico algun momento di nan bida.

Na Aruba no ta diferente y actualmente solamente 1 di cada 3 pashent cu mester haya e atencion medico ta haya esaki. Apertura di e edificio y conta cu mas empleado ta un paso mas pa reduci e lista di espera y mehora e calidad di cuido di salud mental brinda na Aruba, Dellanire Maduro a duna di conoce.

Mehoracion den area di cuido di salud mental ta parti di e programa di gobernacion di e coalicion. Gobierno actual ta trahando riba diferente aspecto riba e tereno di salud mental, por ehempel Minister Andin Bikker ta trahando conhuntamente cu Respaldo riba psikiatria forensico na KIA, tambe tin e Social Crisis Plan di cual Respaldo tambe ta forma parti di esaki, specificamente riba e tereno di nos muchanan y hobennan. Respaldo ta wordo sosteni pa e Fondo di Social Crisis Plan pa por yega na mas psikiatranan pa mucha y hobennan pa reduci e tempo di espera.

“E tratamento di enfermedad mental ta mesun importante cu cualkier otro enfermedad cronico, e ta afecta e entorno di e persona, su relacion, su famia y su trabou. Como Presidente di e Comision Fiho di Parlamento pa Asuntonan Social, Cuido pa nos Grandinan, Famia y Salubridad Publico, lo tene cuenta cu e importancia di e fundacion aki tin pa nos comunidad. Danki na e team di Respaldo y tur persona, instancia cu ta haci esaki posibel”, Dellanire Maduro a conclui.