Recientemente a yega Parlamento un vaststellingsovereenkomst Termination Agreement “Acuerdo di terminacion”, pa asina Parlamento duna gobierno e apoderacion mediante un Ley LV houdende machtiging pa Ministernan firma e Termination Agreement cu Citgo.
E Termination Agreement tin dos componente:
- E garantia di 150 miyon dollar
- Estudio riba medio ambiente y posible contaminacion riba e tereno
1. Garantia di 150 miyon dollar.
Citgo Aruba mediante PVDH (un holding di PDVSA) di acuerdo cu art 11.3 di e contracto oficial Definitive Participation Agreement mester a duna na inicio di e proyecto (na 2016) un garantia di 150 miyon dollar na Refineria di Aruba pa garantisa su obligacionnan. E 150 miyon dollar aki lo ta un garantia pa ora mester desmantela. Pero pais Aruba no kier desmantela e refineria mirando cu nos ta buscando un otro partner.
2. Estudio riba medio ambiente y posibel contaminacion riba e tereno.
A firma un acuerdo cu lo laga un compania externo haci un investigacion desde cu Citgo a drenta October 2016 pa maart 2020. E tereno y e parti cu Citgo lo a contamina den e periodo specifico aki, lo wordo despensa y a keda calcula maximo na 25 miyon dollar. E realidad ta cu Citgo no a opera mes y daño real na e tereno lo ta un suma mucho mas abou.
Umbrella Dispute Agreement.
Ta importante pa menciona cu por a scoge tambe pa otro acuerdo, Umbrella Dispute Settlement Agreement. Escogiendo pa umbrella dispute agreement den e circunstancianan actual lo ta un caminda demasiado largo, dificil y costoso. Pais Aruba lo mester bringa esaki den arbitrage na New York sin garantia cu lo gana e caso y mientras por dura pais Aruba alrededor di 5 aña. Tempo cu den e circunstancianan di pais Aruba, no tin!
Termination Agreement.
Ta importante pa menciona cu pais Aruba no ta regala Citgo 340 miyon florin. Ta asina cu Gobierno di Aruba a logra den e negociacion pa Citgo cumpli cu e pago di 28 miyon florin di impuesto cu nan debe y a percura pa tur empleado haya un pakete segun nan añanan di servicio.
Cu e escogencia di Termination Agreement ambos partido lo exhonera otro y pa Aruba lo ta mucho mas lihe por habri combersacion cu otro partners y yega na ideanan nobo. Esaki sigur ta crea oportunidadnan economico nobo cu por ta sumamente importante den e momento dificil aki cu nos pueblo ta pasando aden.
