Diabierna 11 december 2020, durante un reunion di comision central,Parlamento di Aruba a duna su sentimento pa asina aproba pa deposita e suma di 10 miyon florin di e Interim begrotingsfonds Social Crisis plan 2020-2021 pa sigui cu e implementacion den aña 2021.
E 10 miyon florin aki ta dispone pa sigui cu diferente proyecto, manera entre otro Centro pa Hoben y Famia, y establece e “Child Protection Code” cu ta cay bou e parti preventivo. Tambe tin e parti di crea e Family Justice Center Aruba cu ta cay bou e parti curativo. Un parti di e suma aki ta disponibel tambe pa diferente otro proyectonan positivo cu ta cay bou e Social Crisis plan.
Den e suma anteriormente menciona, tambe ta inclui e extension di contracto laboral di 68 persona cu a wordo tuma den funcion pa asina yuda y asisti e otro profesionalnan pa cu e implementacion di e Social Crisis plan. Esaki ta un suma di 3,2 miyon florin cu ta cubri e salario di e 68 personal adicional.
Sabiendo cu esaki ta un aña hopi dificil financiero mente pa Aruba door COVID-19, Parlamento di Aruba ta mira cu e parti social ta un parti cu mester keda haya su debido atencion y begroting, manera nos a sa di mira desde cu Gabinete Wever-Croes a cuminsa goberna nos pais. Pa aña 2021 mas plannan lo bay wordo concretisa y mi ta sigur e proyectonan aki lo sigui brinda sosten na cada famia y Aruba den su totalidad.
