Dia 10 di november 2021 den un reunion publico Parlamento di Aruba a trata e situacion actual di Serlimar. Durante e reunion por a scucha diferente punto di preocupacion cu Serlimar ta enfrentando. Entre otro, e trahadornan cu ta na riesgo pa perde trabou, uniform adecua pa por eherce e trabou y sin lubida e debe cu Serlimar tin.
E deseo ta pa logra scapa e compania Sui generis Serlimar, door primeramente paga su debenan. E debe ta di 13 miyon florin na impuesto y 7 miyon na companianan priva. Actualmente Serlimar tin surseance van betaling te cu februari 2022 y ta keda pendiente riba e desicion di huez pa e futuro di Serlimar.
E meta ta pa Serlimar bira financieramente stabiel y cu e por sigui cumpli cu su obligacionnan. Pero e importancia ta pa mira con lo mantene Serlimar na un manera sostenibel, door di genera placa pa por keda draai riba su mes. Durante e reunion mi persona a remarca riba parti di procesamento di desperdicio “reciclahe” cu tambe ta un di e tareanan di Serlimar, pero cu no ta den e maneho actual. Esaki sigur ta un oportunidad pa crea entrada y crea mas cupo di trabou pa asina evita cu e personanan tin cu perde trabou. Un idea ta pa mira e modelo cu Curaçao ta trahando cu ne, y di e forma aki implementa un maneho di reciclahe na Aruba.
Recogemento di sushi ta un prioridad. Ta importante pa por tin un vision cla pa asina mantene Serlimar pa di e manera aki garantisa tur ciudadano na Aruba un medio ambiente limpi y saludabel pa biba aden.
