Prome dialuna pa luna di october 2022 a habri hopi positivo. Na pia di Hooiberg Minister Dangui Oduber a anuncia e continuacion pa cu un di e proyectonan pa mehoracion di producto Aruba, Sero di Hooiberg. Den Gabinete Wever-Croes I a cuminsa cu e fase 1 y awo den Gabinete Wever-Croes II ta continua cu fase 2. Den Fase 2 lo modernisa y drecha e trapi completo, drecha gazebo, lo agrega na e top di e sero un mirador. Tambe lo pone e historia di Hooiberg den un arte bunita di mosaic. E embeyecemento sigur lo ta mas atractivo pa e localnan y specialmente pa turistanan pa bishita.
Aruba Tourism Authority ta haci frecuentemente encuesta di e satisfacion di turistanan cu ta bini Aruba y Aruba ta score masha halto mes riba esaki y den region Aruba ta hopi bon para. Algo cu ta bini regularmente dilanti ta cu turistanan ta señala si, cu ta haya falta di mas atraccion turistico pa asina nan por bishita. Pa e motibo aki tambe, ta mira e importancia di e proyecto aki.
Danki na ATA, TPEF, DOW pa haci esaki posibel. Un inversion di 650 mil florin y a wordo inverti pa comienso di aña 2023 por mira e resultado. Asina por duna un producto di calidad halto na nos bishitantenan cu segun pronostico lo sigui aumenta pa aña 2023.
