Ta parce cu coalicion no kier pa e Ley di Screening pa Minister y Minister Plenipotenciario conta pa e ministernan actual ni tampoco pa haci un evaluacion di nan prome cu eleccion. Esey ta opinion di Parlamentario Independiente Daphne Lejuez. “Mi a wak hopi discusion tocante e concepto di ley di screening cu a keda presenta ayera na Parlamento.

Na prome luga, mi no ta contra di e ley di screening, es mas mi ta sostene cualkier proposicion sincero.”

Lejuez a bisa cu e ley a conoce varios version, y e ultimo version, e di cuater, cu a bin hunto cu un di cuater conseho di Raad van Advies. Na e momento cu e di cuater version a keda entrega na Parlamento, “a pidi pa por a haci pregunta por escrito riba e ultimo concepto di ley incluyendo e conseho ricibi di Raad van Advies prome cu bay na trata e ley aki. Pero a ignora e peticion y a yama e reunion publico sin duna Parlamentarionan un chens pa evalua y haci pregunta por escrito y comparti nan sugerencia y preocupacion.”

Daphne Lejuez a sigui splica cu fraccion di AVP a acerca su persona pa presenta un amienda cu puntonan importante y esencial pa por keda inclui den e ley, pa asina dun’e mas substancia. Pero esunnan di colacion cu a tuma iniciativa pa e ley a opta pa tuma solamente dos punto di e amienda, den un nota di cambio, “di e forma aki lagando varios punto di e amienda afo y despues coalicion a vota contra di e amienda tambe. Asina ey a haci’e dificil pa por a bay deacuerdo cu e ley sin e cambionan proponi.”

Lejuez ta enfatisa cu ta importante pa señala , cu Aruba no ta sin ley di screening. “E Landsbesluit inzake screening cantidad minister cu VDA (Veiligheidsdienst Aruba) ta uza pa screen Ministernan ta existi y ta na vigor desde 2013. Es mas, e la bira mas riguroso cu cambionan cu a keda haci na e rekisitonan na 2019, manera por a constata di Minister Marisol Lopez-Tromp ora cu a screen e na 2019,” Lejuez a splica, splicando cu tur hende por lesa e ley di 2013, via e link: https://vda.aw/wp-content/uploads/2017/03/LB-screening-kandidaatsministers-2013.pdf. “Pues no ta asina cu NO tin ley di screening, e diferencia ta cu kier a cambia e Landsbesluit existente pa un Landsverordening y akinan ta unda tabatin diferencia di opinion riba e contenido di e concepto cu e keda presenta. Motibo ta cu e concepto presenta lo ta menos estricto of severo cu e Landsbesluit actual.

Pues ta mustra mescos cu coalicion no kier pa e ley conta pa e gabinete actual ni tampoco haci screening prome cu eleccion, ta opinion di Lejuez. “Si actualmente no tin nada di sconde pakico a bay contra e amienda? No mester midi cu dos midi. Nos mester keda sincero y admiti cu den e coalicion aki tambe tabatin integrante cu tabata mandatario, cu awe ta bou investigacion di corupcion. Ta un figura cu hopi den coalicion a sostene y a bati man p’e y te awe no ta condena locual e la haci a pesar di tur prueba cu ta saliendo na claridad.”

Daphne Lejuez ta bisa cu si kier para pa integridad, e ta reta cualkier di e Ministernan actual y hasta coleganan Parlamentario pa pasa un screening basa riba loke e Landsbesluit actual ta propone versus e concepto di ley cu a keda presenta dialuna den Parlamento.“Esaki, incluyendo e amienda cu a keda presenta. Ami en todo caso no tin nada di sconde y ta sinti cu si kier para pa integridad, transparencia y bon gobernacion no mester pasa ley pa otro, pero cuminsa na aplik’e pa bo mes prome y no purba di hancra e fenomeno di ‘friends & family’ legalmente, pa asina purba hustifica bo maneho,” ta opinion di e Parlamentario Daphne Lejuez.