Bon Dia Aruba a ricibi di miembro independiente di parlamento di Aruba, sra. Daphne Lejuez, un serie di pregunta cu el a manda pa gobierno, relaciona cu e proyecto di ley cu gobierno a manda pa parlamento, pa haya autorisacion pa por negocia un convenio di terminacion di e contrato existente cu e consorcio di empresa conoci bao di e nomber ‘Citgo’.
E consorcio ta consisti, pa loke ta e acuerdo aki, di e empresanan estableci na Aruba y na Merca, cu ta CITGO Aruba Holding LLC,CITGO Aruba Refining N.V., CITGO Aruba Terminal N.V., CITGO Aruba Supply N.V., CITGO Aruba Marine Operations N.V., y PDV Holding Inc. Di banda di Aruba ta parti di e convenio Refineria di ArubaN.V y Pais Aruba.
Na prome lugar e parlamentario lo ta desea di ricibi un resumen di e benta (omzet) di e diferente empresanan durante e tempo cu nan ta(bata) activo, incluyendo esun di Refineria di Aruba NV.
Tambe e parlamentario ta referi na e expresionnan di Prome Ministro den medionan di comunicacion di un suma di 28,8 miyon florin cu e consorcio Citgo lo paga na momento di termina e convenio. Ta puntra kico ta e indole di e pago aki; si ta trata di pago di cuentanan pendiente o como daño y perhuicio. Ta pidi splicacion y tambe un resumen pakico e pagonan aki ta. Alavez ta pidi si gobierno por entrega un resumen di e placa ricibi, y cu mester haya ainda, di loke ta stipula den e contrato di 2016.
Tambe ta puntra si e pagonan pa lease di e facilidadnan a ser haci. Pa e prome tres aña Citgo lo a paga un suma di 10 miyon dollar pa aña cual suma entrante e di cuatro aña lo mester a bira 18,5 miyon dollar. Y den caso cu no a cumpli ainda cu e compromisonan financiero manera describi, cuanto ta loke Pais Aruba lo mester haya ainda a base di e contrato. Tambe ta haci e pregunta pakico no a atende e asuntonan aki na tempo y kico e pais ta bay haci ainda pa recupera e sumanan pendiente aki.
E parlamentario ta haci pregunta tambe encuanto e terminacion mas tempran cu loke e contrato ta premira y cu si den e caso ey e gastonan di desmantelamento lo mester core pa cuenta di Citgo. Con ta duna forma na esaki y ken realmente ta esun responsable pa e costonan di desmantelamento na momento di terminacion.
Pa haya un mihor vista di e gastonan total cu gobierno kier exonera a traves di e convenio cu kier negocia (e asina yama ‘vaststellingsovereenkomst’) , ta desea di haya di gobierno un resumen di e costonan anticipa di desmantelamento manera indica den e convenio cu Citgo, ya cu segun e parlamentario no ta cla cu esakinan ta inclui den e 175 miyon dollar menciona den e ley. E siguiente pregunta ta si e intencion di e autorisacion aki ta cu Pais Aruba ta keda responsable pa desmantela. Y si ta asina, con gobierno tin planea pa atrae fondo necesario pa esaki?
Seguidamente a haci e pregunta con ta para cu e resultado di e investigacion forensico cu lo a haci na Refineria di Aruba NV. Si esaki ta cla caba o pa ki tempo por spera esey. Ademas e pregunta kico gobierno tin pensa di haci cu e resultado y si Staten por haya un copia di esaki.
Lejuez ta referi tambe na e aparente intencion di gobierno pa haya liber disposicion di e refineria y e terminal di crudo, pa por atrae otro interesado pa opera nan. E ta puntra si gobierno no ta considera keda cu e terminal di crudo, cu ta un unidad solvente, y opera esaki bao por ehemplo RdA? Kico lo ta e bentaha di pone den man di otro na lugar di mantene den propio man, e ta puntra. Tambe si por duna informacion encuanto e beneficionan cu e terminal ta generando ainda.
Tambe, si ya tin interesado pa opera e facilidadnan, si por comparti esaki cu Staten.
Nota di redaccion:te aki e serie di pregunta haci na gobierno di parti di parlamentario Daphne Lejuez. Den nos edicion di mañan ta sigui e parti final.
Den un entrevista telefonico cortico cu nos redaccion Lejeuz a indica cu el a haci pregunta extensamente pasobra tin asina hopi aspecto cu no a haya bon splicacion, y unda “ta purba traha riba sentimento di e parlamentarionan.” “Pero e asunto aki no ta trata di sentimento sino di ‘business’: cuanto ta razonable pa entrega na responsabilidad financiero pendiente di Citgo, pa por termina e convenio. Ademas di e aspecto di desmantela cu ta keda full pa nos cuenta.”
