Parlamentario di Fraccion di MEP, Sr. Dangui Oduber, a entrega diferente pregunta na Minister di Finanzas, Asuntonan Economico y Sector Primario, Sr. Geoffrey Wever, relaciona cu e aumento di 30% di gas domestico.
Segun Oduber, e decision aki ta pisa riba e pueblo mientras cu AIB, cu a cumpra Arugas, a genera un ganashi di 13 miyon florin na 2023. “E pregunta cu ta surgi ta kende su interes e minister ta defende? Di pueblo, e homber chikito of comercio?” segun Oduber.
Splicacion di e decision
Mirando e impacto cu e decision aki tini, Parlamentario Oduber ta exigi un splicacion cla di e gobierno tocante e base y hustificacion pa un aumento asina drastico. “Nos ta spera cu e minister por duna un clarificacion detaya tocante e decision di a subi e prijs di gas domestico, specialmente despues di a campaña di mehora e poder di compra di nos ciudadanonan.”
Parlamento Oduber lo warda riba contesta di Minister Wever
Segun e Parlamentario, ta esencial pa Parlamento y pueblo haya transparencia den e manera con ta maneha e fondonan y ki tipo di consideracion ta wordo tuma prome cu implementa un medida. E cuestion aki ta lanta hopi preocupacion den e comunidad y e gobierno tin un obligacion pa duna claridad riba e situacion. Pa e motibo aki Parlamentario Oduber ta pidi pa Minister contesta e preguntanan mas pronto cu ta posibel, pa asina e pueblo por ta informa riba e motibo(nan) tras di e decision pa aumenta e gas domestico.
