Miembro di fraccion di MEP, Sr. Dangui Oduber a manda e siman aki un serie di pregunta pa Minister di Turismo Sr. Cicilia referente e tema di Schiphol Group como tambe e nombramento di un CEO nobo pa e compania. Recientemente a cuminsa busca un CEO nobo pa Aruba Airport Authority y e proceso aki ta canando.

Den e acuerdo cu AAA N.V. tin cu RSG (Royal Schiphol Group) tin poni cu ta e deber y obligacion di Schiphol pa prepara un yiu di tera pa guia y lidera e organisacion. Den practica nunca (20 aña a pasa) Schiphol a sa di cumpli cu e palabracion aki. Un di e diferencianan fundamental cu nos tabatin cu Schiphol ta e hecho cu nos ta convenci cu nos tin profesionalnan local cu por maneha y lidera nos aeropuerto. Di otro banda Schiphol no tin confiansa den esey y nos ta nota cu actual Promer Minister Eman tampoco tin confiansa den nos mesun profesionalnan. Nos mester como Arubianonan siña aprecia, respeta y balora nos talentonan y profesionalnan local y mi ta sinti na Sr. Eman su expresionnan cu e no ta balora ni respeta nos yiunan di tera.

For di aña pasa juli 2024 nos aeropuerto ta wordo maneha pa nos propio profesional local y cu hopi exito. Hecho ta cu aña 2024 ta e miho aña den historia pa e compania caminda a registra un ganashi record. Cu esaki nos a demostra cu nos mes por. Nos semper a balora y aprecia trabounan di nos profesionalnan. Nos tin hende capaz, cu experiencia y conocemento pa lidera pero mester por duna nan e oportunidad.

Aña pasa december 2024 Schiphol Group a informa gobierno cu nan lo bandona Aruba e aña aki juli 2025. Pa es motibo nos kier sa kico ta e posicion di gobierno nobo. Nan SI lo acepta tur e condicionnan di Schiphol? Nan SI lo acepta pa duna Schiphol un boardseat siendo cu nan NO ta shareholder di e compania?Nan SI lo acepta un CEO di afo atrobe? Nan SI lo menosprecia nos propio profesionalnan??

Despues di a hiba un combersacion cu Minister Cicilia durante nos traspaso nos ta sinti cu e siguiente generacion kier para pa nos propio profesionalnan y localnan. Nos ta spera cu Minister Cicilia para duro y no wordo “overruled” pa Prome Minister Eman. Lo ta un lastima y desapunto grandi pa e siguiente generacion pa mira Prome Minister Eman tuma decision pa Sr. Cicilia. E ta e minister encarga cu AAA y e ta esun yama pa para pa nos propio localnan y profesionalnan.

Nos lo mira cu tempo si en berdad nos profesionalnan ta wordo balora, respeta y aprecia pa e gobierno nobo aki! Si bin un CEO atrobe di afo ta obvio cu e gobierno aki NO tin ningun clase di respet pa nos propio profesionalnan.

Como ex-minister encarga cu aeropuerto semper mi a para firme y fuerte contra tur e condicionnan di Schiphol y mi a para firme pa nos propio profesionalnan local pasobra mi ta convenci cu nos mes por maneha nos aeropuerto! Ami si ta duna balor, respet y aprecio na nos profesionalnan local!

Nota di Redaccion: E articulo aki ta un opinion di Parlamentario Dangui Oduber y no ta representa opinion di corant Bon Dia Aruba.