Parlamentario cu a pasa otro un wanta ta bek den parlamento

E partido MFK a anuncia cu lo duna parlamentario Jacinta Constancia su asiento den parlamento bek. Sra. Constancia a sali ayera tambe for di prizon.

E parlamentario y tambe ex minister a entrega su asiento siman pasa despues cu el a dal colega parlamentario Giselle Mc William na su cara durante un debate den parlamento. Sra. Mc William a entrega keho y polis a cera sra. Constancia. Den presencia di un gran cantidad di sostenedonan, famia, colega miembronan di su partido y prensa, e parlamentario a sali for di prizon. “Mi ta contento cu e sosten grandi aki ainda, aunke locual mi a haci no tabata corecto,” el a bisa na e momento ey. Lider di MFK, Gerrit Schotte a bras’e basta tempo pa despues indica cu mas oro nan lo tene un conferencia di prensa. Na e conferencia aki el a anuncia cu nan lo duna sra. Constancia su asiento bek. E lider di e fraccion ta purbando di haya un mayoria nobo den e parlamento di Corsou pa asina evita cu eleccion nobo lo tuma luga despues cu e gabinete Koeiman a cay.