DEN HAAG – Parlamentario Andin Bikker (PDR) a caba di presenta e test case historico pa derecho di voto pa eleccion di Tweede Kamer. Esaki pues ta e Parlamento di Reino, na Raad van State – basa riba e filosofia cu nos ta uniconan cu tin nacionalidad Hulandes cu no tin tal derecho – no obstante cu leynan di Reino ta afecta nos.
Dia 25 di januari, Dia di Betico, Raad van State lo tuma un decision riba esaki. Ayera na Hulanda sr. Bikker conhuntamente cu su partner abogado Dello Gomez a presenta un test case historico na Corte di Reino pa cu e derecho di voto pa eleccion di Tweede Kamer. Esaki segun sr. Bikker, ta basa riba dos argumento central:
1. Cu nos na Aruba, Curaçao y Sint Maarten ta e unico den Reino cu nacionalidad Hulandes cu desde desmantelacion di Antias na 2010 no tin derecho di voto pa Tweede Kamer. Esaki mientras cu nos ta wordo afecta door di decisionnan di Tweede Kamer cu ta e Parlamento di Reino y desde 2012 ta forma Gobierno di Reino via nombramento di e formado. 2. Gobierno di Reino a priminti un Geschillenregeling desde 1993 (areglo di soluciona conflicto imparcial den Reino) y nunca cumpli. Sr. Bikker ta splica cu: “Pa motibo cu nos no por vota pa e Parlamento di Reino, nos como e islanan Caribense no por haci mucho cos a base di e Statuut – cu ta e Constitucion di Reino – si nos no tin derecho di voto pa Parlamento di Reino.”
DESICION
Sr. Bikker ta agrega cu: “Nos argumentonan a wordo tuma debido nota di nan y durante e debate huridico nos por a clarifica e caso ampliamente.” E ta conclui cu: “Nos ta contento y gradici di por tabata tin e oportunidad di presenta e caso y awo ta na Corte di Reino pa dicidi. Nos lo keda en espera di e decision, respetando e discrecion y autoridad di Corte pa den tur trankilidad evalua tur argumento di ambos banda di sala anto asina yega na un decision.”
