Durante di un debate politico den pasado, lider di partido AVP, sr Mike Eman a  declara cu ora cu MEP y su lider Evelyn Wever Croes ta den gobierno, loke pueblo tin cu haci ta tene su cartera duro, Parlamentario Benny Sevinger a mustra.

Awe mas cu dos aña gobernando e pais, Prome Minister Evelyne Wever Croes ta sigui cu e tradicion aki di su partido, sutando pueblo cu  cantidad di medida bou di pretextonan sin hustificacion, rancando miyones y miyones for di caretera di pueblo, Parlamentario Sevinger a  declara.

“’Inicialmente Evelyn Wever Croes y su gobierno,  a usa e pretexto di mega debe pa bin cu cantidad di medida contra pueblo pero despues ta bay Hulanda cu cifranan pa mustra un otro storia bisando cu Aruba su debe ta para na 70% y cu no tin mega debe.

Sinembarto bou di e pretexto ey di mega debe, gabinete Wever Croes a bin cu diferente medida na 2018 y nos por a scucha Prome Minister Evelyn declara recientemente, cu ta un medida so su gobierno a tuma.

Sinembargo ta bon pa refresca su memoria riba medidanan cu el a tuma caba, cuminsando  cu aumento di accijns riba gasolin pa e por a haya 10 miyon extra y despues di esaki  Evelyn a subi accijns general pa asina haya otro suma di10 miyon florin extra.

Siguientemente el a impone e asina yama BAZV cu cual su gobierno a haya 87 miyon mientras cu na mes momento el a redobla BBO for di cual su gobierno a haya e suma di 130 miyon extra.

No tabata suficiente ya cu Evelyn a dicidi di aumenta grondbelasting for di cual el a saca un suma di 14.5 miyon y tabatin intencion di bin cu e sin tax cu ainda no a drenta na vigor cu mester produci  16.7 miyon pa gobierno di Evelyn pero cu ta den tapara ainda pa bin.

A pesar di tur esakinan, Evelyn a introduci tambe e BAVP  bisando pueblo na 2018, cu su gobierno ta bin cu e BAVP  pa asina pueblo por corda ora cu ta paga e impuesto aki, cu esakinan ta pa proyectonan cu AVP cu a ocasiona un mega debe pa Aruba.

Awe pueblo ta core rond, ta mira e proyectonan aki,  greeen corridor, Watty Vos Boulevard, hospital, John F Kennedy centro, tur edificio di MFA, tur bario cu a wordo drecha, centro di Oranjestad y San Nicolas, tur e desaroyonan  aki pa bienestar di pueblo,  Evelyn y su gobierno ta considera mega debe.

A trata di convence pueblo cu pueblo tin cu paga un impuesto extra pa paga pa e proyectonan aki  pero pueblo mester wordo informa corectamente, esta cu ora cu tur e proyectonan aki keda cla, ya cu ainda Watty Vos Blvd. John F Kennedy ainda no ta cla, Aruba lo tin cu paga un suma di 80 miyon pa aña pa e proyectonan aki.

Na momento cu partido AVP  a bandona gobierno, ya caba gobierno tabata pagando un suma di 40 miyon pa aña na proyectonan aki cu nos a realisa durante ocho aña.

Cu otro palabra ta 40 miyon gabinete Wever Croes tabatin mester adicional pa e supuesto  mega debe cu nan mester a bay paga.

BAVP a trece 106 miyon den caha di Evelyn su gobierno,  106 miyon cu el a ranca for di cartera di pueblo, pa bou di pretexto di mega debe, caminda for di e suma aki e mester a paga 40 miyon adicional di loke ya gobierno di AVP tabata pagando caba.

Kico a pasa e ora cu 76 miyon extra cu gobierno di Evelyn a keda cune? Hasta si dado caso mester a paga 80 miyon completo mes, lo a resta ainda 26 miyon for di e placa cu el a ranca for di pueblo.

Awe cu un cara seco Evelyn ta bin bisa pueblo cu su gobierno tin cu bay tuma mas medida nobo pa motibo cu tin cu paga e proyectonan aki mientras cu ningun momento esey ta e caso.

Ta cuanto biaha Evelyn ta kere cu e por sigui gaña e pueblo di Aruba?

Realidad di e situacion ta cu gobierno di Evelyn mester bin cu medidanan extra pa motibo cu su gobierno ta sigui yega e aparato di gobierno cu mas trahado, cu friends & family,” Parlamentario Benny Sevinger a declara.