Parlamentario pa fraccion di AVP, Benny Sevinger den su reaccion riba declaracionnan di Parlamentario di MEP Rocco Tjong, a mustra cu den pasado caba e persona aki a sconde cierto berdadnan tristo di su bida y awor ainda e ta kere cu e por sigui cu e mentira aki. “Otro cos Rocco a bisa den su conferencia di prensa, relaciona cu un otro vonnis cu bo a saca, ta cu Hof a declara bo liber pero bo no ta splica pueblo pakico Hof no a tuma e caso cu a wordo entrega e tempo ey.
Si bo persona no kier splica pueblo esaki ami ta hacie y pakico Hof no kier a tuma e caso, pasobra manera abogado Flanegin ta bisa ta cu pa bo tin un caso ‘strafrechtelijk’ den Corte, Ministerio Publico tin cu entrega esaki strafrechtelijk despues di a haci un onderzoek y esey no a tuma luga.
Ora cu e mucha a bisa su Mama kico a pasa, e Mama a bay conforme e stapnan di haci un denuncia y e abogado ta bisa cu esaki a confirma e mama a bay na polis pa haci un denuncia, despues a bay psicologo, despues a bay dokter pa traha e rapportnan y hiba esakinan pa Ministerio Publico pa cuminsa un onderzoek.
E señora, dokter psicologo ta splica den e documento cu su rapport no ta pa condena ningun hende pero su rapport ta pa mustra Ministerio Publico cu tin suficiente prueba pa cuminsa un onderzoek cu lo caba den Corte unda Hues lo tuma un decision.
E caso no a yega di e leu ey pa motibo cu Ministerio Publico no a acepta rapport di e dokter y ni e psicologo y Ministerio Publico a pidi un di dos opinion na Corsou y esaki a wordo haci pa un psikiatra na Corsou y a yega na mesun conclusion cu esun di e dokter y psikiatra na Aruba y Ministerio Publico no a acepta esaki tampoco.
Ministerio Publico a manda e rapportnan di psikiatra y psicologonan tanto di Aruba como di Corsou, pa un instancia na Hulanda cu ta e Landelijke Expertisegroep Bijzondere Zedenzaken. LEBZ, cual a keda lanta caminda abogado Flanegin ta bisa lo siguiente:
‘segun abogado Flanegin Ministerio Publico a scoge pa no kere e diferente rapportnan traha pa diferente experto pero a prefera pa laga un instancia Hulanda, esta e LEBZ, cu a wordo lanta pa duna Ministerio Publico Hulandes un man, laga nan duna nan opinion riba e rapportnan aki.
E instancia aki a bisa cu nan tin duda den e rapportnan y den e documento e señora ta splica cu ora e carta ey, e advies cu a bin di Hulanda, a puntra Ministerio Publico di Aruba pa wak kico e instancia na Hulanda ta considera cu e expertonan di Aruba y di Corsou, no a haci corecto.
Y den e documento e señora ta mustra cu nan no tabatin mag te dia di awe, di wak pakico nan rapport no ta cuadra y nan rapport no ta profesional.
Te awe e rapport aki di Landelijke Expertisegroep Bijzondere Zedenzaken, a wordo divulga pa asina nan por a defende den Ministerio Publico y bisa nan cu nan no ta di acuerdo cu e opinion di Hulanda y pa Ministerio Publico cuminsa un investigacion.
E no a yega na investigacion y ora cu mama di e mucha a dicidi di bay Hof pa pidi e instancia aki pa pidi Ministerio Publico haci un investigacion, su peticion a wordo rechasa.
Hof a mustra cu e motibo ta cu Ministerio Publico ta kere e instancia na Hulanda.
No tabatin un investigacion manera bo a bisa diaranson Rocco Tjong, cu bo a Sali liber den e investigacion y Ministerio Publico a bay bo tras.
Den e documento aki ta mustra cu e señora kende ta ex Fiscal y abogado di mama di e mucha, ta mustra cu e mama a cana camindanan necesario, segun proceduranan di Kinder en Zedenpolitie y e unico diferencia den e caso aki tabata, contrario na otro casonan, cu Ministerio Publico no a detene e persona acusa, Rocco Tjong, y trece duda den rapport di expertonan.
Pues Rocco Ministerio Publico no a bay over na detene bo manera nan sa haci a base di rapportnan di mesun dokternan aki prome cu esaki pero laga si ta Benny Sevinger, nan lo a detene mi persona prome cu mi a yega cas.
No bo no a wordo deteni pasobra Rocco Tjong tabata un persona di rango halto den polis y no por duda den un persona di rango asina halto den polis y den su integridad.
Expertonan a mustra cu algo no ta klop cu Ministerio Publico no a bay over na investiga bo, pero sra .Flanegin a sigui mustra den e documento aki cu cualkier persona cu keda acusa di comete abusonan sexual, mester exigi di Ministerio Publico pa manda e rapportnan di expertonan pa Hulanda.
Pues Rocco e documento aki ta señala cu bo a comete abuso sexual, anto miho bo bay keha e persona aki, bay Ministerio Publico y mi por duna bo un copia Rocco, pa bo keha e ex Fiscal aki.
Bay keh’e Rocco, bay bis’e cu abo ta un persona integro, pasobra el a mustra den documento di e caso aki, cu e no por compronde con Ministerio Publico por a actua di e forma ey de e caso di bo persona.
Rocco bo a hiba asina hopi caso contra mi persona pa Ministerio Publico pero corda hiba e caso aki tambe pa nan investiga, sigur ora cu nos lesa den e documento cu e caso aki di Rocco Tjong, e psicologo na Corsou, ta bisa cu ta preocupa cu e caso aki di Rocco Tjong, lo pone otro pedofielnan haya un astucia con pa busca un forma pa defende nan mes den futuro.
Pues Rocco e experto aki di Corsou a yama bo persona un pedofiel,” Parlamentario Benny Sevinger a declara.
