Parlamentario Benny Sevinger: Serlimar mes y su trahadonan lo resulta afecta cu cambio di ley

Te cu dia 23 di september awor, e parlamentarionan di e diferente fraccion lo tin chens pa manda nan preguntanan pa gobierno riba e ley di Serlimar, cu lo wordo trata proximamente. Pero prome nan mester warda e contesta di gobierno.

Sinembargo, despues di lesa y studia e ley controversial aki, parlamentario di oposicion, Benny Sevinger, ta haya cu e ley aki ta bay den pugna cu e stabilidad di e compania estatal aki y tambe cu e trahadonan nan beneficio.

Un punto cu el a trece dilanti ta cu si tin un ley actual cu ta bisa cu Serlimar ta cobra tur hende un suma di 25 florin pa tuma sushi for di nan, e no ta haya motibo pa bin cu un cambio di e ley aki. Sinembargo, Sevinger ta haya cu si tin un motibo pa e minister encarga cu Serlimar, Otmar Oduber, dicidi pa cambia e ley aki. El a bisa cu e Afl. 25.- cu Serlimar ta bin cobrando y cu ta 25 florin di nan so, den e ley nobo e destinacion di e suma aki ta bay cambia.

Di e 25 florin, 17.50 florin ta bay pa e tratamento di sushi, kiermen e compania cu lo ta encarga cu esaki. Mientras cu 7.50 ta bay pa esun cu ta bay recoge e sushi. Actualmente Serlimar ta haci ambos cos. Pero e ta haya cu e mandatario a split e suma aki pasobra e 17.50 no ta bay pa Serlimar, sino cu e ta bay pa un compania nobo. Pues e ta haya cu no solamente EcoTech ni Ecogas ta resulta perhudica cu e ley aki, sino cu Serlimar y su trahadonan tambe ta bay sufri, pasobra e placa ta bay pa e compania nobo.

Mientras e ta haya cu no mester mira e ley nobo di Serlimar los di e compania nobo cu lo bini. Sevinger a añadi cu no ta Serlimar ta esun cu ta haciendo un destaho, sino e minister mes. E mandatario ta esun cu ta bay cera e contract cu e compania nobo pa 20 aña, sin aprobacion di Parlamento. Pa asina e compania nobo por haya un garantia di Gobierno pa inverti un suma di casi 350 miyon florin. Ya cu e ley ta papia di un ‘landsbesluit’ locual ta contra ley tambe, segun e parlamentario di oposicion.

Tur e cuestionamento riba e ley di Serlimar aki, Sevinger lo trece den parlamento, ya cu parlamentario ta haya inaceptabel con e minister encarga cu Serlimar ta pusha un ley asina. Un ley riba cual Raad van Advies (RdA) a bin cu cuestionamento fuente, entre otro riba e suma cu ta inverti den e compania estatal aki.

Un parti cu ta cuestiona tambe ta cu e minister ta haya cu e solucion pa atende cu e problematica di sushi y di e dump ta un incinerator, sin un estudio bon haci pa evalua diferente alternativa.