Parlamentario Benny Sevinger (AVP): Ta corta den AZV pero no den salario di Nel, Rudy, Nilo, Eddy y Otmar

Den ley ta bisa cu si AZV no por cubri su gastonan, gobierno di Aruba tin cu bula aden pa cubri e gastonan aki, Parlamentario Benny Sevinger di fraccion di AVP a mustra. Pues loke AZV mester a haci for di inicio caba ta di bisa gabinete Wever Croes cu salud su siguradonan, di pueblo di Aruba, ta mas importante cu loke gobierno a manda bisa AZV cu e tin cu corta 50 miyon na gasto.

Cu den ley ta para cu gobierno tin cu cubri e gastonan aki y cu AZV no ta bay corta nada na e momentonan aki y mester a bisa cu si kier papia riba termina largo por haci esey.
“Sinembargo AZV no a cana e caminda ey, simplemente a tuma palabra di Minister Dangui Oduber di ‘ban corta’ y a sinta cu e Minister pa mira con ta bay corta.

Den e proceso di cortamento aki, dokter y specialistanan a bisa gobierno cu nan ta dispuesto pa entrega parti di nan salario, pues Minister Oduber por a bisa Hulanda, cu dokter y specialistanan ta bay corta parti di nan salario y cu esey ta loke por a spaar di AZV.

No tabatin motibo di bay corta ‘daggeldvergoeding,’ no mester a corta den servicio di dialyse, tampoco corta den servicio di dentista y tampoco lo mester a forsa pueblo awor pa paga ora cu nan bishita un dokter. No gabinete Wever Croes a dicidi cu cout que coute ta bay corta 50 miyon den AZV y esunnan cu ta mas vulnerabel pa e medida aki di Minister Oduber, ta e hendenan cu no por bay paga un ‘eigenbijdrage’ pa bay dokter pasobra e no tin e placa ey, e no tin placa ni pa come corda pa paga bijdrage.

Loke ta bay pasa ta cu e hendenan aki lo bay bira mas malo prome cu nan yega na un dokter y na final nan ta bay para den un hospital, caminda esaki lo bay costa e pueblo mas placa.

No ta Benny Sevinger of AVP ta bisa esak, pero estudionan riba ‘eigenbijdrage’ no ta bay produci nada na entrada, pero a lo largo ta bay costa pueblo hopi mas placa.

Esey ta e berdad di e situacion aki, ya cu ta Ministernan di Aruba a dicidi di bay corta den presupuesto di AZV y no ta Hulanda.

Prome Minister Hulandes, Rutte recientemente a declara cu ta Aruba, esta gabinete Wever Croes, ta manda bisa Hulanda con e bay corta gastonan di AZV y mesun cos cu salario di ambtenaarnan. No ta Hulanda a impone y ta gabinete Wever Croes a manda bisa cu eynan e ta bay corta.

Ta surgi e pregunta grandi di con a bais cu ta bay corta eynan?

Esaki ta hopi cla ya cu e Prome Minister no por bay bisa cu e ta bay corta den su coordinadonan, den tur e prima- y primonan cu ta traha rond di dje, cobrando entre 9 pa 12 mil florin pa luna anto algun di nan drumi na cas, acudi de bes en cuando na oficina den Cocolishi, gaña wak e Minister. Rumannan di Glenbert Croes, tres of ta cuater ruman den gobierno, pero tambe ex- Ministernan manera Nilo Swaen cobrando extra, Rudy Croes cobrando extra, Otmar Oduber cobrando extra, Nel Oduber cobrando extra, Eddy Briesen cobrando extra pero gobierno no ta bay corta riba e gastonan aki.

Kico lo costa Prome Minister Evelyn bisa Nel Oduber cu e 4 mil cu e ta haya pa luna extra ey, riba tur e pensioennan cu ya e ta ricibiendo, e no ta bay haya esey mas ya cu bo no por corta den AZV pa scapa e 4 mil florin di dje, ya cu e tin hopi placa cobrando caba.

Pero esaki Evelyn no por bisa Nel Oduber, ya cu esaki di su parti lo bisa e Prome Minister con ta para cu tur bo prima- y primonan, ki a para di bo papa cu ta cobra miyon for di gobierno.

Nel lo bis’e cuminsa na papa prome anto despues por papia y esaki ta motibonan cu tanto salario di ambternaarnan, cuido medico, esta AZV, eigenbijdrage y otro fondonan, ta esunnan cu gabinete Wever Croes ta bay corta. Esey ta e realidad,” Parlamentario Benny Sevinger a declara.