Parlamentario Benny Sevinger (AVP): Pueblo y comerciante prepara pa introduccion di impuesto na ‘port’

Mas y mas ora di cana den pueblo, ora di bishita tanto ciudadanonan como comerciantenan, e topico di combersacion ta bira e aumento di costo di bida cu ta sigui crea problema financiero serio pa tur hende.

Miembro di fraccion di AVP, Sr. Benny Sevinger a mustra cu ta un situacion cu a bin ta desaroyando su mes den ultimo dos añanan y bou di ningun circunstancia esaki lo tin di haber cu crisis of problemanan riba nivel mundial, tampoco pa motibo di guera den nos region pero al contrario, ta un desaroyo cu tin di haber cu asuntonan di Aruba.

“Gobierno di Evelyn Wever-Croes hunto cu su socio Otmar Oduber a implementa un serie di medida riba nos comunidad cu a pone cu awe costo di bida a subi y lo sigui subi.

E desaroyo aki ta wordo confirma cu cifranan publica pa Centraal Bureau Statistieken, cu ta mustra riba e realidad di e situacion cu nos hendenan ta pasando aden.

Un realidad cu ora bisa pueblo con e cifranan aki a subi, nan ta bisa cu no mester bisa of mustra nan e cifranan, ya cu ora cu nan bay cumpra pan, cumpra lechi, comestibel pa prepara cuminda, ora di cumpra carni of galiña, nan ta sinti e aumento aki directamente den nan saco.

Sinembargo, ora cu haya sa confirmacion cu e aumento di costo di bida aki no tin nada di haber cu ningun factor internacional pero puro domestico, e ora pueblo tin cu realisa cu nan tin un gobierno cu a gaña henter pueblo den mal forma y ta sigui gaña nan.

E desaroyonan aki ta na bista di tur hende, ya cu durante di campaña e actual Prome Minister tabata bisa pueblo cu nan tabata pagando 250 pa awa cu luz, pero cu nan supuestamente mester a paga 125 florin, cu nan tabata pagando tanto pa lechi, pero cu nan mester ta pagando mita di esaki.

El a bisa cu pa fruta nan mester tabata pagando mita di loke nan tabata paga, cu e gobierno di Mike Eman tabata malo, vota pa su persona, ya cu su persona lo bay baha edad di pensioen, cu e ta bay baha gastonan di gobierno, cu e ta bay baha e debe, cu e ta bay baha coordinadonan, cu e ta bay baha prijs di fruta y berdura, baha tur cos pa pueblo!

Realidad sinembargo a bira cu na momento cu Evelyn Wever-Croes a drenta gobierno, e prome cos cu el a haci ta redobla BBO, redobla BAZV, aumento di prijs di awa y luz, pone accijns, caminda directamente su gobierno a saca 270 miyon for di saco di pueblo.

Anto nan splicacion na pueblo ta e storia increibel cu ta comerciantenan ta bay paga esaki, esta tur e aumentonan aki, pero cua comerciante ta bay duna gobierno 270 miyon sin mas?

E suma aki e comercianete ta pag’e berdad, pero ta pasa e costo aki pa pueblo, caminda e ta pone esaki den e prijs di su productonan y ora cu pueblo a cuminsa mira riba su recibo cuanto gobierno di Evelyn ta ranca for di su saco, di mas di 10%.

Pueblo a ripara cu ta gobierno ta rancando e placa aki for di dje, for di su entrada di tur luna y awo gobierno kier kita e prueba aki for di e recibo, pa pueblo no mira cu ta gobierno ta bay cu e placa aki.

Sinembargo, tin mas noticia malo na caminda, ya cu nos por a scucha caba aki y aya cu gobierno lo bay introduci un impuesto na ‘port’, esta cu asina e producto yega pa drenta na waf of aeropuerto, eynan caba e comerciante tin cu paga un extra impuesto cu despues e ta pasa pa pueblo paga esaki cu aumento riba e producto.

Esey ta nifica cu ta dal un belasting na port, pa despues ora cu e pasa port sigui dal pueblo cu e aumento di BBO, BAZV y otro medidanan cu nan a introduci caba y ta mas cu claro cu prijs di productonan lo sigui subi, lo sigui bira mas caro y caminda pueblo los sigui confronta problema pa cumpra loke e tin mester cu menos placa, placa cu gobierno a ranca for di su cartera,” Sevinger a declara.