“Sistematicamente Gabinete Wever Croes ta sofocando esunnan mas vulnerabel den nos comunidad. Atrobe e contratistanan chikito na DOW ta victima di un otro decision di corta den nan pago. E biaha aki a kita nan bonus di fin di aña cu tabata entre Afl 650,= florin pa Afl 1350,= pa aña”, esaki parlamentario Benny Sevinger a denuncia cu pruebanan den su man.
Contratistanan Chikito segun e contract den articulo 29 tabata tin derecho riba un bonus ora nan cumpli debidamente cu nan trabao. E bonus aki ta pa bon prestacion cu nan a haya den tempo di Minister Sevinger mes. Pa hopi contratista e suma tabata core entre 650 pa 1350 florin.
Contratistanan chikito awor ta wordo forsa dor di Gabinete Wever Croes pa firma cu ta elimina e bonus aki. Esaki ta e forma di opera di e gobierno esaki Sevinger a denuncia. Di un banda ta caba di duna e suma 25 florin riba salario minimo y di otro banda ta kita 1350 florin di e mesun contratista chikito. Un abuso di marca mayor. Gabinete Wever Croes ta kita dobel di locual nan a gaba cune na aumento di salario minimo’, parlamentario Sevinger ta reclama.
Parlamentario Sevinger ta bisa cu lider di Partido, Mike Eman ya na diferente ocasion a mustra riba e abuso cu ta haciendo cu e contratistanan chikito. Na e momento aki lider di partido, Mike Eman, ta sosteniendo su esposa Doina den un kebrante di salud, pero mi tin contacto cune y e ta solidario cu e contratistanan chikito y hopi pendiente pa nan wordo defendi, parlamentario Sevinger a splica.
Na final di aña caba e prome mita di e bonus a wordo kita. Lider di AVP, mr. Mike Eman na e momento ey a sali mustra cu atrobe decisionnan ta cay cu ta perhudica e contratistanan chikito aki di famianan humilde. Esaki a sosode hustamente den fin di aña cu mas famianan tin mester di nan entrada. E momento ey Gabinete Evelyne Wever Croes a tuma un otro medida inhusto cu a afecta severamente e entrada di e contratistanan chikito cu ta traha pa DOW.
Tambe Gobierno a dicidi pa forsa contratistanan chikito inhustamente den mas dia liber sin pago den fin di aña. Gracias na protesta di Lider di AVP, Mike Eman y intermediacion di mediador, Anselmo Pontilius, e decision aki a keda revoca, pero e kitamento di mita di bonus a keda un hecho. Awor ta henter e bonus ta bay wordo kita segun e papelnan cu a cay den man di parlamentario Sevinger.
Na final di aña Mike Eman a bisa di no ta compronde kico ta intencion di Gabinete Wever Croes pa cu e famianan humilde aki. Prome a mira un persecucion partidario cu a kita un cantidad di contratista chikito puro pa motibo di nan color politico y awor ta impone e medida inhusto aki riba e contratistanan chikito. Hunto cu e medidanan cu a aumenta costo di bida ferozmente, cuanto abuso mas Prome Minister Evelyne Wever Croes ta kere cu e pueblo aki por soporta, e lider di AVP, mr. Mike Eman a subraya cu hopi preocupacion despues di a scucha e dolor adicional aki di contratistanan chikito.
Parlamentario Sevinger ta mustra cu na e momento aki por mira cu locual Lider di Partido Mike Eman a denuncia na final di aña a bira hasta peor cu e decision awor di kita e bonus completo di contratistanan chikito. Por cierto parlamentario Sevinger ta bisa cu locual ta sosode aki mester wordo hiba dilanti corte, pasobra un homber chikito ta wordo forsa pa acepta un adaptacion den su contracto cu ta na su desbentaha, pero esun cu e poder ta mal usa esaki y forsa e contratista chikito pa acepta eliminacion di bonus regla den articulo 29. Sino lo tin consecuencia pa nan contract, esdesier nan por wordo kita bao cualkier pretexto y perde nan pan y di nan famia.
Claramente esaki ta mustra cu ta recorte ta bay tin den presupuesto di DOW pa 2020 y minister ta obliga director pa cuminsa cu e contratistanan cu ta mas vunerabel. Si mira con gasto a subi pa e contratistanan aki a rais di tur e medidanan cu e gobierno aki de Evelyn Wever Croes a tuma, nan a perde mas di 10% di nan entrada caba, awor ta bolbe dal nan un sla bao faha kitando nan bonus.
Pero pa un conferencia de marihuana si gobierno a pone 2 miyon florin, pa ministernan biaha rond mundo si gobierno a pone 6 miyon, pa abogadonan di famia si gobierno a pone miyones sin conta tur e familiarnan di ministernan cu ta cobra salarionan barbaro mas 25% di toelage costando miyones.
Parlamentario Sevinger a termina bisando cu na luga di gobierno compensa e contratistanan aki pa tur loke nan a perde na medidanan, awor ta kita mas. E gobierno aki di Evelyn Wever Croes no tin curason pa nos pueblo, sla pa pueblo basta nan si biba bon. AVP lo ta hunto cu e contratistanan aki pa bringa pa nan derechonan.
