Parlamentario Benny Sevinger (AVP): Evelyn ta campeon gañado y caso Besaril ta confirma esaki atrobe

Mas y mas comunidad di  Aruba ta birando consciente di e forma con Prome Minister y lider di MEP, Evelyn Wever Croes, ta biba pa gaña pueblo, ta biba pa sconde cosnan cu ta pasando den su gobierno pero ta sigui gaña sabiendo cu tur hende sa cu e ta gaña.

Parlamentario pa fraccion di AVP Benny Sievinger durante conferencia di  prensa a mustera cu por ehempel den e caso di Arubahuis, conoci como caso Besaril pa pueblo, Evelyn ta bisa cu rapport riba e asunto aki no ta cla pero den Parlamento, CAD ta bin informa cu rapportnan ta cla for di luna di Januari 2022 caba.

“Na Juni di 2022 Evelyn ta informa Parlamento y  cu e no kier bin Parlamento pasobra e lo daña e onderzoek pero CAD despues ta informa Parlamento cu e rapport ta cla for di luna di Januari caba y  despues e mesun Evelyn ta confirma esaki.

Aki pueblo por mira con Prome Minister cu rapport di CAD den, a sconde esaki pa asina den le tempo ey, trata di cubri of regla cosnan cu no ta bon den e  investigacion aki of cu lo ta malo pa su gobierno y pa Besaril.

No pa drecha loke Besaril a haci fout pero pa tapa pa di e forma ey Ministerio Publico lo no por haci un onderzoek riba Besaril pa tapa pa MEP.

Esey ta e liña cora cu tur hende por mira tur dia den e gobernacion aki ya cu no ta solamente Minister President ta esun cu tin e malesa di gaña  y ta su persona a pega tur su coleganan den conseho di minister cu e malesa di gaña aki, ya cu tur ta bin dilanti cu cara serio, mal informa pueblo loke nan a bin ta haci for di 2017 te cu awor.

No solamente Evelyn siendo Prome Minister a mal informa Parlamento riba e investigacion cu tabata cla for di luna di Januari di 2022 pero ora cu CAD a confirma den Parlamento cu tur informacionnan cu tabata bay rond relaciona cu e caso di Besaril, tabata corecto.

Besaril, kende como Minister Plenipotenciario na Den Haag, a haci mal uzo di fondonan di Arubahuis, diripiente awor ta bon pa entre otro e candidato di partido MEP aki, por paga e placa cu el a maluza back como si fuera ta Evelyn y MEP ta Ministerio Publico y Hues na mes momento.

Awor Evelyn a dicidi di bay entrega keho na Ministerio Publico, ya cu e ta kere den integridad di su gobierno pero na luga di entrega keho contra di Besaril cu ta su responsabilidad como Prome Minister, Evelyn a dicidi di entrega keho contra di henter Arubahuis, pa cual tin cu bolbe bay haci un investigacion pero lagando Besaril for di persecucion di ley.

Despues cu sali na cla cu Evelyn a gaña riba e keho entrega, ta bin Sali na cla cu el a ordena retiro di Besaril for di servicio di gobierno, pues tambe como miembro di KPA pero mesora Besaril a bin dilanti y splica cu e lo entrega un protesta contra di e decision tuma pa cu su retiro, loke ta pone cu Besaril lo keda cobra te ora cu un decision legal y definitivo cay den su contra.

Pues e ta retira pero no ta retira y tin cu informa si ainda e ta cobrando su overbruggings toelage,” Benny Sievinger trece dilanti den conferencia di prensa di AVP.