Parlamentario Arthur Dowers(AVP): ‘Enbes di paga 10 miyon na helicopter hink’e den overtime pa polis’

“Un gobierno cu a bisa cu nan por goberna a resulta cu nan no sa kico nan ta haci,” ta expresion di Parlamentario Arthur Dowers riba pregunta di situacion di overtime di polis. A resulta cu nan ta busca tur cos di afo, cu ta costa placa. Mientras expertonan local lo a yuda nan baha gasto.

Dowers ta bisa ta señala cu gastonan ta bay na nombramento den gobierno di hendenan cu no a contribui na nada, ni na bienestar ni siguridad den pueblo. Unicamente chicando dor di e saco di pueblo. Manera entre otro tur e famianan nombra den Bestuurskantoor, miyones na oficina di Papa caminda cu por corta y resta ainda cu por pone pa polis.

Realidad di bida, ta cu e trabou incansabel cu polis a haci den e aspecto preventivo, manera controlnan den trafico cu e minister tabata contra, e trece resultadonan grandi/ positivo cu a reduci risico considerablemente.

“Obviamente locual nan tin cu haci ta corta cerca nan, cerca duivel friends y cerca family y e ora ta resta suficiente pa e otro parti di siguridad. A mira un helicopter cu a bin y cu no a contribui cu absolutamente nada na siguridad di e pais te na e momento aki, caminda cu e placa ey ( alrededor di 10 miyon na un contract ) lamentablemente no ta trece nada pa e pueblo siendo cu e placa ey por a uz’e na siguridad di bida di e comunidad. Cu presencia di polis riba caya caminda lo tabata tin espacio pa overtime.”

Ademas di overtime a compronde cu no tin material tampoco. Mientras cu tin scarsedad enorme di material, e Minister ta scondiendo pa e realidad.

Parlamentario Arthur Dowers ta enfatisa riba e hecho cu e periodo cu e Gobierno anterior a laga tur cos regla y cu el a probecha di esey. Awo e periodo di cosnan bon a pasa, e mester enfrenta e realidad cu e tin cu traha riba su mes y ta claramente cu e no por logra esaki.

Consecuencia lo bira mas overtime.
E ta traha contrario na locual el a spera. Momento cu corta den overtime, cierto sucesonan lo tuma luga y/o aumenta y logicamente tin cu bolbe pone mas polis riba caya cu mas overtime. Dowers di su banda ta bisa di ta contento cu e incidencia di High Impact Crimes a sigui baha durante e añanan cu ta yuda baha den overtime, igual ta conta e aña aki pa locual ta trata e temporada di carnaval cortico. Pero por mira claramente cu pa 2020 e temporada lo ta hopi largo y cu esaki e ta bisa e Minister di Husticia “Maak je borst maar nat” pasobra ta hopi placa extra lo bay den overtime.

”Situacionnan cu bo no tin den man. Si e minister no ta traha den forma preventivo e tin un problema serio. Un di e camindanan cu por traha preventivo cu bon resultado hopi grandi pa e comunidad ta hustamente den trafico. Ta reduci risico, aumenta presencia y limita daño na comunidad. E dañonan mas lamentabel y innecesario ta pasa ora tuma risico y ta algo cu e gobierno por pone algun medio financiero pa programanan preventivo cu sigur ta yuda en bes di gasta placa den cosnan cu no a duna ningun resultado pa e comunidad.”