ORANJESTAD – Diamars mainta den conferencia di prensa di partido AVP Arthur Dowers a informa riba e preocupacion cu tin den comunidad riba un carta manda pa Banco Central pa cu e proyecto di hotel na San Nicolas.
Un show a tuma luga cu brasamento y firmamento pariba di brug, sin tene cuenta cu tin hopi bista riba nan y di esunnan cu kier bin acosta di tur cos cu placa sushi of placa di unda sea e ta bin pa asina realisa un proyecto cu “ cueste lo que cueste “ paso nan saco mester wordo yena!
Un di esunnan menciona durante conferencia tabata Rudy Lampe, actual minister di Enseñansa, cu por a corda tabata ocupa su mes, den tempo cu su partido no tabata den gobernacion, cu un bus riba un “Corruption Tour” na diferente sitio rond nos Isla apuntando asina ey varios proyecto como proyecto corupto. Awe tin cu cuestiona tanto Rudy Lampe, Ricardo Croes y un persona di masha importancia esta Jan de Ruiter, unda nan a keda?
E persona Jan de Ruiter “Jan de Knecht” pa añanan cu palabranan di abuso contra tur hende na radio y rednan social dia aden y dia afo, denunciando tur tipo di corupcion cu cartanan falso den nomber di e actual minister presidente cu acusacion infunda, awe ta keto!. Incluyendo su persona cu por cierto ainda e ta warda pa bay ministerio publico pe, asina Dowers ta bisa.
Arthur Dowers ta cuestiona e silencio y ta puntra, “Dicon awo si Jan den Knecht ta keto“ ? Kico a pasa cu e Bus, gasolin a caba, bateria ta flauw? Dicon no tin presencia di e grupo aki na e proyectonan aki pa asina bisa pueblo riba e “corruption tour” tumando luga. Dicon awe Jan de Ruiter, Rudy Lampe y Ricardo Croes ta keto?
Arthur Dowers tambe ta cuestiona e motibo tras di e pacto di gobernacion cu ta bisto caba cu nan no ta bay logra, pero asina mes nan ta den silencio. Jan de Ruiter tabata persona cu na momento di menciona Oduber tabata yam’e “OTNAR” y awo ta “Otje Godje” na conviniencia personal bou custia di e pueblo aki permitiendo sinberguenseria!
Ta di sigui investiga y haya claridad riba informacion cu de Ruiter y demas a divulga pa asina desenmascara Oduber riba e proyecto aki caminda corupcion ta e base riba cual nan kier traha e proyecto di hotel na San Nicolas, dowers a bisa.
E team di integridad (ficticio) cu nan tabata yama nan mes, di fama hende, awe ta den silencio hermetico, mientras Banco Central tin cu sali y duna un alerta den un forma masha diplomatico pa asina manda un señal cu bo no por construi un proyecto “a costo te todo” y mas importante ken ta esun su tras y kico ta locual cu nan ta bay haya di esaki. Acusacionnan riba otorgamento di tereno a keda afirma masha tempo caba cu su mes colega Lopez Tromp tabata esun encarga di a parti esakinan descabeyadamente y no Benny Sevinger.
Dowers ta finalisa bisando cu e no tin ningun tipo di confiansa mas den e gobierno actual aki, den e politiconan envolvi den e caso aki. Ta varios di e politiconan man teni cu ne awe debe pueblo un splicacion, manera entre otro Dangui Oduber, Rudy Lampe y Ricardo Croes pa asina pueblo por conclui si ta nan ta esunnan awo ta hayando “Maleta de Rosas” , bou presion, si ta miedo nan tur tin di sali for di gobierno of si nan tur tin cos pa haya den tur e asunto aki. Lo keda en espera di reaccion di Partido RED como tambe di e consehero principal di Wever Croes esta Jan de Ruiter.
