Scucha Prome Minister Evelyn Wever Croes tur merdia y anochi trata di convence pueblo di loke su gobierno ta haciendo, ta hiba pueblo pensa bek riba e tipo di fiestanan di ‘back to the ’80’s’ miembro di fraccion di AVP, Arthur Dowers ta declara.

Segun Dowers ta mesun Prome Minister aki, cu mesun cara serio, cu mesun cara falso cu cual el a priminti pueblo despues cu a huramenta su gobierno cu nan lo NO tuma medida contra pueblo, a bira ni un luna despues aumenta BBO y traiciona confiansa di pueblo manera nunca antes a yega di conoce.

“Ta increibel scucha e lider di MEP papia cu seriedad di e situacion cu tin na e momentonan aki, culpando e corona virus pa tur e desaster y den un forma hopi arogante, hasta menasa trahadonan publico y nan sindicatonan cu aki tres luna lo no tin placa pa paga nan salario.

Prome cu e corona crisis Aruba a conoce e Evelyn crisis, un gobierno cu a suta pueblo cu medida den prome tres aña na poder, cu a reduci poder di compra di pueblo, cu a ranca miyones for di cartera di pueblo y di comercio pa financia e maneho di su gobierno.

Miyones a wordo ranca for di pueblo y prome cu corona virus a bati na porta di henter mundo, ya caba pueblo di Aruba a conoce e virus financiero ocasiona pa gabinete Wever Croes sin cu tabatin mucho cos bon na caminda pa pueblo.

Ta for di e tempo ey caba Evelyn y su gobierno ta papia cu no tin placa, a trata di gaña pueblo cu e tin debe pa paga pero awor ta bin resulta cu e virus cu su gobierno a plama den pueblo, ta existi for di 2017 caba y mester a bira mas pio den 2020 ora cu mester a introduci otro serie di medida pa medio di e di dos fase di reforma fiscal.

Ehempel di e Evelyn Virus pueblo a ripara for di momento cu di repiente Nelson Orlando Oduber a presenta como vocero y defensor di gobierno y di partido MEP, criticando sindicatonan y tur hende cu ta papia cu mester manda hendenan cas, incluso ex ministernan cu awor ta consehero y miembro di hunta di comisario den companianan estatal.

Esey ta muestra palpabel di hipocresia caminda Prome Minister cu tin Nel como consehero pa su gobierno, ta permiti’e bin defende un maneho cu semper tabata un abuso contra interes di pueblo.

Nel Oduber tin asina hopi pensioen ta cobrando cu practicamente e ta cobra mas cu cualkier minister di e actual gobierno pero ainda e kier mas cobrando suma di mas di 4000 florin como miembro di un of otro hunta di comisario.

Evelyn a opta pa laga cualkier hoben capacita, un hoben cu por tin un vision diferente pa atende cu asuntonan di e pais, un banda y opta pa emplea no uno ni dos, pero cinco pa seis ex minister como consehero, pagando nan miles di florin y awe e ta manda Nel Oduber bin defende un maneho cu ta Evelyn cu Nel y nan hendenan so ta haya hustifica.

Awor ningun hende mag di papia di manda Nel, Rudy, Briesen, Swaen of cualkier otro cas prome cu nan pidi trahadonan pa entrega parti di nan salario pero Prome Minister ta insisti pa sindicatonan compronde su version, su vision con e ta kere cu cosnan tin cu bay y esey semper mester ta na beneficio di su famia y amigonan, di sponsor y conseheronan,” Parlamentario Arthur Dowers a declara.