Miembro di fraccion di AVP den Parlamento, Arthur Dowers a mustra para dilanti di oficina di Lotto pa Deporte den Havenstraat, riba e hecho cu Prome Minister Evelyn Wever Croes, a pone un pushi den persona di Minister Endy Croes, pa e cuida e pisca cu ta Lotto pa Deporte.

Segun e parlamentario, tin un sentencia caminda Hues a baha hopi pisa riba man di Endy Croes y cu e tin cu wordo retira for di Fundacion Lotto pa Deporte, pa motibo di e comete actonan contra ley.

Arthur Dowers a sigui mustra cu den un di e sentencianan, ya cu tin un serie, ta mustra cu na varios ocasion a wordo mustra cn Endy Croes a favorece no solamente su mes, mientras cu e tabatin un salario di 14.500 florin pa luna, mas 250 florin di representatiekosten y adicional ora cu e biaha pa exterior, e por a declara tur gasto adicional cu el a haci durante di e biahe aki.

“Awor ta bin resulta cu Endy Croes tabata biaha regularmente riba custia di Lotto, tabata usa un credit card, tabata saca placa for di caha di Lotto, y riba dje tabata declara cierto sumanan di placa na Lotto.

Tambe ta bin resulta cu Ebndy Croes a biaha na varios ocasion na 2008 y 2009, caminda cu el a saca placa di Lotto pa bay biaha y tambe e tabata usa e credit card pa declara e mesun costonan aki, cual ta poni den e decision di Hues contra di su persona.

Banda di esey ta poni cu Endy Croes tabata biaha cu hendenan cu no tabatin drecho di biaha of no tabatin ningun nificacion den e afiliacion pa sirbi un of otro interes den Lotto pa nan a biaha cu su persona y e hendenan aki tabata haya daggeld vergoeding y riba dje Endy Croes tabata paga pa medio di e credit card di Lotto, pa gasto cu e hendenan aki haci.”

Dowers a sigui mustra cu den e documento di Corte por a mira c’un aña Endy Croes tabata paga un di su rumannan un suma di casi 2000n florin y cu no tabata ningun hustificacion pa mira di con el a paga su ruman e placa aki.

Fuera di esaki por mira cu Endy Croes tabata huur luga di buta fiesta di su ruman riba costo di Lotto y pa esaki tampoco tabatin hustificacion con e por huur algo riba cuenta di Lotto pa famia.

”Tin un punto den e documento di corte aki sumamente importante pero ta bon pa pueblo ta na altura di esaki, ya cu Prome Minister Evelyn Wever Croes ta haci como si fuera e no ta na altura di infraccionnan pisa contra di integridad cu Endy Croes lo a comete contra di nos comunidad.

Endy Croes a laga Lotto practicamente bancarota y cualkier otro organisacion bou di e circunstancianan ey lo a bati bancarota pero asina mes el a bin den Parlamento algun dia tras, pa mustra cu e tin papel pa mustra cu el a laga placa den caha di Lotto, cu ta un luga di bende number.

Ta mas cu claro cu asina bo bende number tin placa den caha pero ora cu laga miyones di debe e ora e tiki placa cu boa cobra di bendemento di number, no ta cubri e debenan cu el a laga atras.

Hues den su decision a mustra cu hunto cu Lotto, ta kere cu esaki ta malversacion caminda retiro inmediato ta hustifica.

Banda di esaki Hues ta mustra cu un director general di un fundacion cu metanan publico, tin cu score halto riba nivel di integridad y en particular e tin cu percura pa asuntonan financiero entre su persona y e fundacion, hasta e minimo impresion no por tin indicacion di un conflicto di interes ora cu ta trata di asuntonan financiero di e fundacion.”

Segun Parlamentario Dowers, Hues a mustra cu e tin su score masha halto riba tereno di integridad pero Endy a faya pisa riba tereno di integridad y aki Hues a mustra cu como quiera cu el a faya den e asunto di integridad, ta hustifica pa e wordo retira for di su cargo.

Den otro palabra Hues a mustra cu e persona di Endy Croes a usa Lotto di tal forma cu dado momento e no tabata mas e diferencia entre si Lotto ta di pueblo of ta di su persona.

Hues a agrega tambe cu como Endy Croes tabata haci esey, dado momento no tabatin un definicion entre “dimi y dibo” den e organisacion aki, Parlamentario Arthur Dowers a declar ayera mainta.