ORANJESTAD – Parlamentario Arthur Dowers a informa awe di e preocupacion cu tur hende tin referente e proyecto den Colony cu vinculonan dudoso. E tema cu a causa conmocion den nos comunidad den fin di siman ta esun di Banco Central, na momento cu a sali un carta di alerta cu a manda relaciona cu e proyecto di hotel na San Nicolas.

Interesante riba e tema aki, pa pueblo comprende y realisa ta, cu e proyecto di hotel aki ta e rason cu awe partido MEP hunto cu Otmar Oduber y Rudy Lampe ta den Gobierno. Na un principio mester menciona e Proyecto Bahia Principe cu tabata un “Big Surprise” pa tur hende ora den scuridad di anochi a hinke den otro y lanta mainta cu conferencia di prensa pa anuncia esaki sin cu demas coleganan tabata ni conoce esaki. Cu asombro por a constata con colega Benny Sevinger cu ta esun encarga, es tempo ey cu otorgamento di tereno, a keda sorprendi cu colega Oduber lo a anuncia otorgamento di tereno pa proyecto di Hotel y riba un tereno bastante grandi na San Nicolas. Momento cu e opcion a presenta cu e refineria lo por habri atrobe, Oduber a rabia y bandona partido AVP. E causa principal di e kiebro di Oduber y Partido AVP.

Dowers ta sigui bisa, Proyecto di Hotel y Reapertura di e Refineria tabata e causa cu el a bandona partido. Pa es motibo mes Oduber a vota contra su reapertura den parlamento. pero hunto cu ne tabatin otro parlamentario cu a sostene esaki y cu un motibo. Nan dos a resulta despues di a forma partido hunto y awe den gobernacion, esta Andin Bikker.

Pueblo tin cu realisa cu e carta cu a bin di Banco Central no a bin pornada. “cueste lo que cueste” e Hotel aki tin cu bin y ta p’esey ta alerta pasobra nos por imagina caba kico lo ta bin akitras. Ta menciona Dangui Oduber tambe, cu ta politico cu semper a critica fuerte y abiertamente contra Otmar Oduber, y awe nos ta testigo con na dos ocasion caba ta sinta y brasa cu ne y ta yama bon bini na proyecto grandi di Oduber.

Frase manera “Maleta de Rosas” ta algun di esnan cu Dangui den su tempo tabata tilda Otmar Oduber di dje, maleta yena cu dollar ta algun di e acusacionnan cu e la tira pa añanan den su direccion. Mientras awe e silencio ta conviniente pa ambos y “Maleta de Rosas” a pasa pa olvido. Lo ta bon si Dangui Oduber lo por bin dilanti y duna pueblo un splicacion riba esaki y su sosten netamente riba un proyecto caminda e kiebro politico a tuma luga entre partido AVP y Oduber.

Pueblo awo por mira ta dicon logicamente Otmar Oduber ta haya e cartera di Infrastructura, esaki no ta pornada! E hecho cu e no por a desaroya e proyecto ta pasobra e no tabatin e cartera di infrastructura y awe, den palabracion desde un inicio cu Evelyn Wever Croes pa un pacto diabolico pa un futuro gobernacion, ta cartera cu e la haya pa sigura su proyecto.

Otmar Oduber enemigo number un riba lista di tanto Evelyn Wever Croes, Dangui Oduber, Xiomara Maduro y Besaril, pero milagrosamente a logra haya otro pasobra mester construi e proyecto aki. Na su banda Croes a sigui cu e palabracion haci y a tuma e cartera di e refineria pa asina sigura cu esaki lo keda para definitivamente y garantisa construccion di dicho proyecto di Oduber. Wever Croes den prome encargonan riba e refineria a presenta den parlamento pa anuncia estudionan cu lo tuma luga y mira ta con lo bay pone paro definitivo na e refineria, lubidando su compromiso cu pueblo y promesa falso di campaña pa habri esaki. Unda nan ta awe pa duna pueblo cuenta, nos no sa!