Gabinete Weve Croes ta dunando tur indicacion cu como gobierno, ya nan no a importa nan mes si CAft conseha RMR pa duna nan un KB y asina Hulanda pasa pa tuma direccion di e pais aki totalmente over.
Miembro di fraccion di AVP, Arthur Dowers ta mustra cu ora cu analisa e carta cu Minister di Finansa a manda pa CAft como reaccion riba 13 punto di observacion cu e comision di supervision a mustra gabinete Wever Croes cu nan in cu cambia den presupuesto 2022, esaki ta un berguensa di marca mayor.
“Un reaccion bergonsoso ya cu CAft ta mustrando e gobierno di Prome Minister Wever Croes riba palabracionnan cu nan no a respeta y no ta ehecuta, bo ta haya un Minister di Finansa Xiomara Maduro, reaccionando mescos cu su gobierno a cumpli cu tur cos y simplamente ta informa CAft cu e gobierno aki, no por haci mucho mas.
Pues ningun caminda den e carta di Minister Maduro, por lesa kico nan lo bay haci, con nan lo bay cumpli cu sugerencia y consehonan cu CAft kier mira ehecuta den e presupuesto aki pero den cierto forma ta simplemente ta informa cu su gobierno no kier cumpli cu tur loke a wordo palabra for di 2018.
Loke por anticipa akinan, ta e hecho cu gabinete Wever Croes practicamente ta entregando e pais aki bek na Hulanda, ya cu no solamente nan no solucion con pa atende cu asuntonan di interes nacional y general pero nan incapacidad ta keda confirma den tur palabra cu nan expresa.
Palabranan di cual mayoria a resulta despues di a mentiranan flagrante, trociendo un berdad cu henter pueblo sa cu no ta berdad pero nan ta sigui insisti na gaña pueblo na tur momento c’un situacion presenta pa esaki.
Loke nos ta mira den e actitud di Minister Maduro a un tipo di incapacidad cu for di prome dia cu el a asumi e cartera di finansa, el a demostra cu e no tin solucion pa atende cu interesnan financiero di e pais, e interes di henter un pueblo.
Ta algo serio cu un mandatario den un tempo asina dificil pa henter pueblo, ta dicidi di hunga weganan di palabra sin sentido, sin solucion haciendo hasta cherche di e comision aki, riba su pagina di facebook.
E falta di seriedad aki ta tipica e incapacida di e gobierno aki, un gobierno cu no tin solucion pa pueblo, cu no por alivia e presion di inflacion inmenso cu pueblo ta ser confronta tur dia cune pero si ta sigui crea un ambiente hostil y di incapacidad sin presenta un solo discusion serio cu CAft riba e situacion cu tin.
Loke nos ta mirando na e momentonan aki, kisas tur hende caba ta mirando esaki, ta e hecho cu gabinete Wever Croes di Prome Minister Evelyn Wever Croes, ta entregando autonomia di nos pais, entregando autonomia di e pais na Hulanda no solamente pa motibo di nan incapacidad pero cu loke nan a core firma cu Hulanda, awe nan tin cu cumpli cu loke nan a firma no un bes pero cantidad di bes,” Parlamentario Arthur Dowers a declara.
