Gabinete Wever Croes a converti su mes den Reino Hulandes, como e prome ‘Festival di Gañamento’ den historia di gobernacion di Reino Hulandes.
Arthur Dowers, miembro di fraccion di AVP ta mustra cu esaki ta mas cu logico y tabata di spera ya cu for di e prome dia despues cu tur Ministernan di e gabinete actual a hura cu nan lo sirbi interes di pueblo na tur momento, nan a bira claba pueblo un puñal den lomba.
“Politiconan y mandatarionan cu tin e curashi di traiciona nan propio hendenan cu a vota pa nan, hendenan cu nan a sigura cu nan lo cambia e situacion financiero sin tuma medida, a wordo engaña malamente cu excuusnan barata y sin sentido.
Ta cuanto cos e gobierno aki a gaña pueblo den menos di dos aña na mando y tur dia pueblo por ripara cu hasta nan no tin berguensa mas di pone un cara di palo pa gaña tur hende y simplemente nan no tin gevoel mas.
Pa colmo e gañamento a inicia na e propio Prome Minister, kende simplemente no sa mas kico pa bisa of con pa haci pa trata di convence un pueblo, cu a sufri asina hopi caba, hogando den un lama di speransa falso cu a wordo presenta na nan.
Esaki un biaha mas a keda comproba ultimo dianan caminda publicacionnan riba e cantidad impresionante di biahenan pa exterior, a sali na cla y aki Minister di Financia, Xiomara Ruiz Maduro, ta bolbe insisti cu esakinan ta hustifica.
Den su afan pa gaña y falta respet pa pueblo ta bin dilanti pa trata na hustifica e gasto halto aki, mientras cu su gañamento ta asina bisto pero ya e mandatario aki no tin berguensa di sigui baila pueblo, sigui di bisa cosnan cu no ta berdad.
Segun Minister Xiomara, el a realisa varios biahe pa exterior y pa hustifica esakinan, el a mustra cu hopi di nan ta biahenan pa recupera credibilidad financiero pa nos pais, un observacion asina ridiculo cu e mandatario aki mes no ta realisa cu e no por sigui haci e tipo di maniobranan aki.
Na prome luga Minister aki e ora tin cu splica pueblo ta kico tanto IMF, Standard & Poor’s y Fitch Ratings ta bin haci na Aruba pa algun aña caba, ya cu ta nan ta institutonan cu ta evalua e maneho financiero di gobierno, e desaroyo economico cu tin y ta conseha gobierno kico pa haci.
Ta e institutonan mundialmente renombra esaki nan ta pero aparentemente Minister Ruizx Maduro a descubri otro institutonan mas renombra na Fiji, Bora Bora y otro luganan cu el a bishita gastando placa di pueblo pa esaki.
Minister a biaha entre otro pa bay baila seu na Bonaire y baila hoolahoop y el a biaha pa Corsou pa jump up eynan y a biaha pa otro paisnan caminda su biahe no tabatin niks te maken cu asuntonan financiero di nos pais.
Sinembargo Minister Xiomara ta sigui kere cu pueblo ta sigui cay pa e tipo di manipulacionnan aki, pa e tipo di gañamentonan cu nan a bin ta contando for di prome dia den gobernacion.
Ta con por hustifica cu gobierno ta bay kita overtime di maestronan pa un suma cu ta igual na loke e ministernan di gabinete Wever Croes a biaha rond mundo caba?
E minister a gasta miles di florin pa recupera credibilidad financiero pero gobierno di Hulanda a duna Xiomara y su Prome Minister, un ultimatum pa introduci mas medida y kita un grupo grandi di hende for di trabou ya cu esaki no tuma luga, gobierno di Hulanda lo interveni y pone gabinete Wever Croes bou curatela.
Un minister cu a bay drecha crebilidad financiero di e pais, ta imposibel por hustifica cu gobierno di Hulanda tin problema cu e credibilidad financiero cu su persona ta papia di dje,” Parlamentario Arthur Dowers ta declara.
