Parlamentario pa fraccion di AVP, sr Arthur Dowers a mustra cu Aruba tin un Prome Minister den persona di Evelyn Wever Croes, cu tin un vision y compas politico domina por completo pa gañamento.

‘For di momento cu Evelyn a actua como formado y despues a bira Prome Minister, e vision di promesanan bunita pa pueblo, a desaparece y e vision aki a habri caminda pa un serie di gañamento, caminda despues di tres aña den gobierno, ainda e ta kere cu e por sigui manipula pueblo.

El a cuminsa pa sigura pueblo cu su gobierno ta bay ta un gobierno di 7 minister y e partido cu no kier acepta esaki, lo no forma parti di su gabinete.

Wel lider di POR, awe retira y bou investigacion Otmar Oduber, a pone Evelyn cambia di tal forma te cu el a dal pueblo un tubo formal, formando un gabinete di 8 minister y camuflando un di nuebe c’un asina yama staatssecretaris pa maneho di cuido medico.

Tur promesa cu el a sigura pueblo cu e lo cumpli cune, esta di drecha finanzas publico sin medida, gobierno a sinti e engaño aki den prome lunanan caba y te awe ainda pueblo ta mirando cu mas y mas e placa den cartera di pueblo, ta birando menos dor di e medidanan aki.

El a priminti di reduci edad di pensioen, el a priminti reduccion di prijs di awa y coriente, el a priminti di haya un operado pa refineria y awe el a cera e refineria un biaha mas.

Despues di a gaña pueblo, Evelyn den su calidad como Prome Minister, a dicidi di purba di haci mesun cos cu gobierno di Hulanda, firmando protocolnan cu nunca el a cumpli cu nan, sigrando Rijksministerraad cu e lo percura pa no aproba e cambio di ley pa loka ta supervision financiero, dunando sosten publico na un amienda di e tres fraccionnan marioneta cu ta sostene su gobierno.

Awe Hulanda kier bin tuma tur cos over ya cu Evelyn no a cumpli cu loke el a priminti, no un bes pero varios bes ora cu e ta papia cu gobierno di Hulanda.

Un biaha mas por a nota con ni pandemia ta scapa na man di Evelyn Wever Croes, kende riba sun social page a pone dia 28 di juni cu 11035 turista a yega Aruba y cu a test nan tur y cu ta solamente 9 a test positivo na covid, pues 11026 a test negativo.

Pa pone forsa na su maneho cu su gobierno a hiba pa covid, prome Minister a pone abou e marca di #Disciplina pero awor e propio cifranan di DVG ta mustra cu turistanan cu a wordo controla ta 6290 cu ta hopi menos cu loke e mes a propaga na grandi, mustrando un biaha mas cu Evelyn simplemente no ta respeta e pueblo cu el a hura pa sirbi cu tur integridad posibel.

Realmente memey di un pandemia mundial, Aruba tin un Prome Minister cu ta trata di get away cu cosnan su simplemente no ta necesario pero di otro banda ora cu ripara desaroyonan den su gabinete, e forma con practicamente den tur ministerio tin problemanan serio, na luga di soluciona esakinan na interes di e pueblo cu e tin cu sirbi, Evelyn ta trata di engaña pueblo pa su mes mustra bon.

Sinembargo e berdad semper ta sigui su tras y ta sigui alcansa su persona y caminda simplemente no por tin hustificacion pa e falta di respet aki pa pueblo di Aruba,” Parlamentario Arthur Dowers a declara.