Durante tratamento di presupuesto supletorio siman pasa den Parlamento, Presidente di Parlamento Edgard Vrolijk, a permiti Prome Minister Evelyn Weaver Croes, espacio total pa e insulta y falta respet na Parlamentarionan di oposicion.
Tur esaki pa motibo cu miembronan di oposicion, a tribi di cuestiona e maneho di Prome Minister y henter su gobierno, a cuestiona e acuerdo secreto entre WEB Aruba NV y Eagle LNG, caminda ainda pueblo no ta wordo permiti pa mira kico e tin cu bay paga pa 20 aña largo.
Miembro di fraccion di AVP, Arthur Dowers a mustra cu tur loke a resta Prome Minister Evelyn Wever Croes, ta pa insulta miembronan di oposicion ora cu e berdad wordo treci dilanti.
“E dianan aki ta crucial pa pueblo di Aruba, caminda tur hende por mira cu e pais ta wordo dirigi pa un Prome Minister cu tin problema personal serio pa distingui entre maldad y berdad, tumando decisionnan cu no ta na interes di pueblo.
Na e momentonan aki, pueblo di Aruba tin un gobierno di partido MEP, sigur ora cu mira con e partner chikito di e coalicion, RAIZ, ta wordo manipula y trata manera politiconan sin poder y sin confiansa propio.
No por splica di otro forma con Prome Minister a crea un set up di companianan estatal bou guia di cantidad di su famianan directo y inderecto, anto ta bira firma un contract pa WEB cu Eagle LNG caminda ta pretende cu gobierno mes no a haya e contract pa mira y no sa di su contenido.
Ora cu oposicion a cuestiona cantidad di cosnan dudoso cu ta tumando luga, Prome Minister a considera esaki como actonan di shisheria caminda el a haya sosten di Ministernan Xiomara Maduro y Glenbert Croes, pa astua como coro den e reunion siman pasa.
Tur hende ta shishi den Prome Minister su concepto, a yama parlamentarionan pa sinberguensa y corupto pero papia di loke lo bay bira e contract mas corupto den historia di pais Aruba, Evelyn no a toca esaki nunca.
Awor ora cu scucha con e lider di MEP ta reacciona aki na Aruba, por mira un diferencia di 180 grando ora cu for di Den Haag, Secretario di Estado Raymond Knops, informa Tweede Kamer y gobierno Hulandes, cu practicamente tur declaracion di Prome Minister Wever Croes, ta un mentira grandi y cu nada cu e ta bisando na Aruba, no ta basa riba berdad.
Un berguensa grandi y un acto di cobardia ora cu e Prome Minister mentiroso aki, ta sinta keto y permiti Raymond Knops cuestiona mesun cosnan cu nos di oposicion ta cuestiona pa algun tempo caba y Evelyn ta keda keto keto.
Sinembargo ningun momento por a scucha Evelyn bin dilanti y cuestiona declaracionnan di Raymond Knops pa actonan di shisheria, cu esaki no ta berdad ya cu e ta bon na altura cu hasta na Hulanda a bin ripara cu su forma di hiba politica, ta a base di gañamento.
Na mes momento ta bin sali na cla cu Premier Wever Croes ta gañando sindicatonan cu e ta hibando negociacion riba e medida di 12.6% di trahadonan publico pero awor CAFT ta mustra cu for di dia 29 di november, a informa gabinete Wever Croes cu no tin espacio pa dialogo of negociacion riba e punto aki,” Parlamentario Artthur Dowers a declara.
