Mientras cu gobierno a rancando for di salario di trahadonan publico y miembronan di Cuerpo di Polis, Minister di Husticia ningun momento por hustifica su mal maneho cu el a bin ta hibando for di tempo cu el a huramenta como Minister.

Arthur Dowers miembro di fraccion di AVP a mustra durante conferencia di prensa di fraccion di AVP a mustra cu Minister di Husticia Andin Bikker nunca tin contesta adecuado pa hustifica su maneho cu el a bin ta hibando.

“Na prome luga nos tin cu mustra cu den e tempo di crisis aki, caminda polisnan no ta nada contento cu e forma con gobierno di Andin Bikker ta hincando man den nan salario, tin cosnan cu e minister aki no por hustifica.

Con ta pidi polisnan pa entrega parti di nan salario den tempo di crisis, anto Minister Bikker tin un Hefe di Polis, un persona cu el a scoge personalmente pa bandona su trabou den sector priva pa bin tuma e posicion aki, no ta trahando pero si ta sigui cobra su salario como hefe di polis.

Na mes momento Minister Bikker a nombra un otro funcionario policial pa actua como Hefe interino di Cuerpo di Polis, caminda e tambe ta cobrando e salario cu ta cuadra cu e responsabilidad cu e tin cu carga.

Fuera di esaki pueblo completo ta pagando pa un proyecto di helicopter cu practicamente no ta dunando beneficionan tanto anticipa pa e propio Minister Bikker pero e ta costando un dineral pa mantene e aparato aki na disposicion di gobierno.
No solamente Minister Bikker ta conoci pa e hecho cu ainda pueblo no a mira e maneho cu tanto el a priminti durante di campaña mescos cu henter su coleganan di gobierno, pero e hecho cu un Minister di Husticia ta trata di sconde e berdad, no ta un aspecto mucho alentador.

Siman cu a pasa Minister Bikker a bolbe wordo confronta cu otro mentira di su parti, na momento cu el a nenga loke mi a trece dilanti anteriormente, cu trucknan di brandweer tin cu wordo gestart cu Pif Paf. Sinembargo pa su mala suerte ata e medio di comunicacion 24Ora a publica un relato y hasta cu foto na momento cu tabata cende un truck di brandweer cu Pif Paf, pues confirmando loke nos a wordo avisa caba di dje.

Nada pero net nada Minister Bikker a haci pa e departamento di brandweer, caminda hasta por spera cu e lo por bin dilanti y elogia su mes cu cuerpo di bombero a haya varios truck nobo, mientras cu e trucknan aki ta un donacion di gobierno Hulandes, trucknan cu ta segunda mano.

Minister Bikker y su gobierno no a cumpra ningun truck of material nobo pa brandweer cu awor ta pasando den un situacion no mucho positivo.

Ta mesun cos den e maneho cu Minister Bikker a hiba pa loke ta castigo pa esunnan cu haci nan mes culpabel na abuso di mucha, presentando un ley na Parlamento pa aumento di castigo pero caminda Raad van Advies practicamente a bisa e minister aki cu e no sa kico e ta haciendo.

Den pasado gobierno di AVP a yega di aumenta e castigo pa e delito serio aki caba pero ni cuanto aumenta e añanan pa e delito aki, e ta keda na Hues cu ta trata e caso pa determina con halto e castigo di e culpabel lo bira.

Sinembargo Minister Bikker ta pretende di a lubida cu el a laga varios pedofiel sali liber prome cu nan a finalisa e periodo di castigo cu hues a impone pa e hendenan aki y na tur forma el a trata di laba manda di e decision incorecto aki.

Pues Minister Bikker ta sigui cu su maneho pragmatico manera cu e mes ta yam’e pero sin cumpli cu tur loke el a priminti pueblo cu e lo haci,” Parlamentario Arthur Dowers a declara.