Parlamentario pa fraccion di AVP, Sr. Arthur Dowers ta mustra cu declaracionnan di Minister di Financia Xiomara Maduro na Hulanda relaciona cu e trato di Hulanda pa cu Aruba, no tin nada di haber cu sclavitud di pasado y tampoco moderno.

“ Ta bisto cu e Minister di Financia ta gaña rabia y a basha su gal riba gobierno Hulandes y pueblo Hulandes, tambe riba  Secretario di Estado van Huffelen, entre otro acusando Hulanda di ta trata Aruba manera esclavonan manera den pasado. Sinembargo e declaracion aki ta otro intento pa sconde tras di e gran fracaso di loke su Prome Minister Evelyn Wever-Croes a hinca pais Aruba aden pa loke ta introduccion di Rijkswet di supervision financiero.

Ta eynan e problema grandi ta sinta ya cu pueblo di Aruba awor tin cu paga un interes demasiado halto pa prestamo ricibi durante di pandemia di COVID y tur esaki pa motibo cu gabinete Wever-Croes II, no kier cumpli cu loke a firma p’e. Claramente por ripara cu tanto Prome Minister como e Minister di Financia, ta ehecutando un plan pa gana simpatia for di pueblo di Aruba, sabiendo cu loke ta pasando na e momentonan aki, ta un hecho cu e gobierno di MEP y RAIZ a bin a haci for di algun aña caba, esta di palabra algo cu Hulanda,  pa despues pone esaki un banda como si fuera nan no sa di algo.

Desde cu Evelyn Wever-Croes a bira Prome Minister di pais Aruba, el a bin ta firmando acuerdonan cu Hulanda na tur momento cu e biaha pa Den Haag sin cu e ta wordo acompaña pa un miembro di su gobierno y ta sinta firma tur loke gobierno di Rutte e pone su dilanti pa e firma. Despues e ta hunga rol di “yo no fui’ pero ta Evelyn ta e arkitecto di  e problemanan aki, hungando rol di laba man di tur cos, mientras cu tanto su persona como Xiomara Maduro, ta bon na altura kico nan a haci. Awor cu Hulanda a bay di acuerdo pa impone un interes di 6.9% riba cu Aruba a ricibi pa e situacion di pandemia, awor kier hunga rol di victima acusando Hulanda y van Huffelen di un trato inhusto y hasta colonial.

Ta bon tambe pa mustra cu e acuerdo di refinanciamento di e ‘coronalening’ cu 6.9% di interes, tambe tin firma di Prome Minister Evelyn bou di dje pa despues nan bin hunga rol cu ta Hulanda ta forsando nan gobierno di haci esaki. E situacion actual di pago di interes halto, no tin nada di haber cu e trato di Hulanda ya cu hasta siman pasa conseho di Minister di Reino a bay di acuerdo pa cambionan presenta den e ley di LAft, cual ley ta e propio gobierno di Evelyn y Xiomara, a trata di manipula pa laga CFT completamente for di e asunto aki, cual ley ainda ta warda den lachi di Evelyn su oficina.

Awor ta mesun ley aki nan mester a bek pa cambia esaki pa tene Hulanda contento pero te ainda Prome Minister no a bin Parlamento pa presenta e cambionan aki pa aprobacion pero den e situacion dificil cu a hinca pais Aruba, no a momento pa sigui sconde berdad pa pueblo,” Parlamentario Arthur Dowers a declara.