Un bes mas for di Kamini’s Kitchen na Lago Heights, unda cu tanto local como turista ta disfruta di platonan delicioso manera, “roti” y “curry dishes”. Mi plato faborito ta e “roti” cu calco. E servicio ta excelente y ambiente agradabel. Riba peticion awo tambe tin desayuno.
Tur cos ta asina bon cu tempo a yega pa Kamini’s Kitchen expande su restaurant pa acomoda tur su clientenan, specialmente si e intencion ta pa desaroya bek e economia di San Nicolas. Na e momento aki, tin diesun (11) hende local ta labora, cu e expansion esaki por hasta redobla. Asina mas mama y tata di famia por traha cerca di cas y pone pan riba mesa. For di 2018 Kamini’s Kitchen ta canando un caminda di cruz pa e por logra su meta.
Loke cu tin Kamini’s Kitchen stroba y wantando e oportunidad pa su negoshi por sigui crece y pa San Nicolas por desaroya ta e falta di servicio cu e ta experenciando di DIP. Ainda e no por haya un contesta riba su peticion. Ademas di esaki, e ta un falta di respet cu ami como parlamentario ta experenciando. Ta mas cu un (1) aña y mey cu mi a puntra con a para cu e peticion di Kamini’s Kitchen y varios otro. Si por tolera cu un parlamentario no ta haya contesta riba su preguntanan, e ora berdad ki speransa un ciudadano tin.
P’esey mi a haci e peticion na nos Minister di Infrastructura pa percura cu DIP contesta tur peticion cu tin riba mesa. Ta un lastima cu un bunita proyecto asina ta keda pega pa falta di maneho di DIP.
