Durante siman, mi a bishita Enseñansa Pa Empleo (EPE) hunto cu nos Minister President, Minister di labor y mi colega Ricky Hoek. E facilidad no ta completamente cla, pero por mira caba cu e ta un hoya di proyecto. Enseñansa pa Empleo tin varios localidad- y ekiponan nobo cu lo brinda un cantidad grandi di curso na comunidad di Aruba pa asina nan por sigui desaroya nan mes.
Casi 600 hende ta haya curso na Enseñansa pa Empleo, tanto local cu no tin un trabou ainda, como esnan cu ya ta activo den mercado laboral, pero cu kier sigui capacita nan mes of cu kisas ta desea di cambia di profesion. Tambe, esnan cu ta bin di afo y kier participa activamente den e mercado local ta haya e hermentnan pa por contribui mas miho posibel na nos pais. E alumnonan di Muchila Creativo tambe ta haya curso den horeca como waiter y bartender. Despues di finalisa e curso ta ricibi un certificado y por drenta den mercado laboral. Mi a dialoga cu e directora Sra. Sabine de Groot unda mi a enfatisa riba e importancia pa sigui amplia e “network” cu ta envolvi den Enseñansa pa Empleo, pa asina sector priva tambe por haci mas miho uzo ainda di e facilidad cu tin pa por duna enseñansa na empleadonan y kisas hasta aporta na un manera financiero. Y asina e mercado laboral di Aruba vooral pa nos localnan bira uno mas exitoso ainda.
