“Hasta muchanan di otro districto ta bin te San Nicolas pa bay John Wesley College (JWC),” asina Chris James (a.k.a. RudeBoy) a splica mi. JWC College semper tabata conoci como un scol streng cu ta educa su alumnonan pa tin respet y orguyo. Hopi habitante di San Nicolas y bisindario a atende JWC y tin hopi recuerdo di nan hubentud na e scol situa na Mgr Verrietstraat 9.
Hopi mayor a frecuenta e scol atendiendo cu nan yiu y e futuro cu nan ta construyendo door di logra un MAVO diploma. Durante 62 aña hopi habitante di San Nicolas a traha na e scol aki, ganando nan pan di cada dia, como maestro of “ondersteunend personeel”. Ciere di JWC ta causa un dolor den hopi hende, un scol cu a haci un impacto importante den nan bida.
Stichting SPCOA, cu ta e instancia autorisa pa JWC, a comunica cu cera e scol tabata inevitabel, pero mirando cu desde 2016 e cantidad di studiante ta birando menos, te cu a yega un momento cu e scol no ta sostenibel mas. Gobierno di Aruba, Minister di Enseñansa su rol pa cu JWC ta pa duna un subsidio basa riba e cantidad di alumno.
Mi ta apoya e iniciativa di Sr. Chris James pa sondea si tin posibilidad pa tene e scol habri. Por a mira e sosten pa e ‘Candlelight Vigil’ cu el a organisa diahuebs anochi. Chris e expresa cu su intencion no ta nada politico, tampoco pa critica gobierno, solamente pa sondea un manera pa su scol stima por sigui existi pa siguiente generacionnan.
