Encuentronan cu hendenan integro lo causa cu bo por wordo infecta. Actonan no integro, principalmente den gobiernom, no ta aceptabel, specialmente ora e meta ta pa logra sosten di ambtenaarnan y e pueblo en general. Un mandatario lo mester por defende su maneho y decisionnan na un manera transparente den parlamento, comisionnan fiho, riba medionan social y den casonan extremo dilanti hues.
E ley ‘integriteit ministers’ ta un comienso, un bon comienso. Pero su exito ta depende riba tur e pasonan cu lo bin despues cu ela wordo acorda, con integridad ta bai sigui wordo implementa den tur skina di tur departamento.
Integridad ta contagioso, bo mester di hende integro pa motiva otronan pa actua na un manera integro. Bo no por forsa hende pa ta integro. Integridad ta bin di paden, algo cu bo mester sinti’e, bib’e, un conviccion. Ora hende ta sinti balora y por tin e speransa cu esnan responsabel ta haci nan esfuerso pa nan, ta tera fertil pa integridad so por florece.
Pa promove integridad di bo hendenan bo mester traha pa bo hendenan ricibi loke nan merece. Un vision cu nan por kere den dje, un plan realistico con pa logra e vision, percura pa bo hendenan ricibi e posicion legal cu nan merece. Mi lo kier mira den maneho di ministernan y mando di departamento elementonan cu lo promove integridad, yuda hendenan pa scohe pa haci lo corecto. Maneho cu ta promove actonan positivo y cu ta preveni actonan indeseabel, cu ta motiva e ambtenaarnan pa djis focus riba nan trabou.
Na mi coleganan, comunidad, no laga nos bai usa integridad como un herment pa kibra otro. Ban ta skerpi riba otro, evalua otro riba nos comportacion, decisionnan, maneho y laga ‘integridad’ ta un di e criterianan. Pero semper cu e bienestar general den mente.
