Palabranan di pabien na sr. Robert Candelaria cu su promocion pa Comisario di polis. Un promocion na su luga mirando cu Sr. Candelaria a eherce funcionnan di “Hoofdinspecteur” pa varios aña prome cu el a bay den sector priva.
Sigur un vacatura cu mester a wordo yena dos aña y mey pasa caba, pa asina haci e ekipo di maneho di KPA, Korps Management Team (KMT) completo y mas fuerte back. Pabien tambe na korpschef Sr. Ramon Arnhem y nos Minister di Husticia Rocco Tjon. Pa Cuerpo Policial ta esencial cu e KMT ta completo pa asina duna un servicio optimal na e coleganan den e Cuerpo. Un di e retonan structural den Cuerpo Policial ta e proceso di promocion. Polisnan ta warda añas sin claridad ki tempo nan lo ricibi e promocion y e “rechtspositie”cu nan merece.
Causa di esaki ta procesonan interno den KPA cu no ta canando bon, combina cu procesonan cu ta tarda demasiado largo na Departamento Recurso Humano. Ambos trayecto mester wordo evalua y unda necesario adapta, pa asina polisnan por ricibi loke nan merece den un tempo rasonabel. Mirando cu varios polis ta tranca den nan posicion huridico pa basta tempo caba, hasta mientras ta eherciendo un funcion pa hopi aña.
Un suplica na Sr. Robert Candelaria pa di su banda promove e trato husto di nos coleganan. Polis cu ricibi loke nan merece ta mas motiva pa duna pueblo di Aruba e servicio cu e merece.
Mi ta en espera di korpchef Arnhem pa bin Parlamento y duna un splicacion di su vision y su plan con e lo logra e vision aki, specialmente pa su coleganan cu ta percura pa nos isla ta mas sigur posibel. Exito na Candelaria den su funcion nobo.
