Mientras cu pueblo ta den necesidad pa (haya un siguransa cu) por gosa di alimento di calidad halto na un prijs rasonabel, nos por sinti cu falta accion di banda di gobierno riba e topico aki.
Na luna di maart 2022, net un aña pasa, mi a entrega un mocion pidiendo gobierno pa percura cu e industria di agricultura ta wordo desaroya. Un danki na mi coleganan den Parlamento pa aproba e mocion unanimamente. Den e mocion mi a urgi pa eleva Santa Rosa na un nivel cu e por encabesa e industria innovativo aki. Kisas mi a asumi robes cu “food security” ta un tarea y responsabilidad di esnan na cabes di Sector Primario. Pensando mas leu, siguridad di cuminda por ta un responsabilidad di Salubridad Publico tambe.
Mirando e “economic spin off” e por wordo carga door di Ministerio di Economia. Hecho cu disponibilidad di tereno ta primordial, e topico lo por cay den man di Minister di Infrastructura. Sin laga afo e importancia di labor y enseñansa pa percura cu nos tin suficiente hende educa, preferibel local, cu por carga e industria nobo aki. E industria innovativo aki ta rekeri un bon colaboracion entre varios departamento gubernamental, cu ta resorta bou cartera di Minister di Asuntonan General. Pa e motibo aki mi a dirigi un carta na Minister President, como dirigente di tur Minister, puntrando e.o. cua gobernante (lo) ta esun indica pa sinta na cabes di e mesa pa logra “food security” pa pueblo di Aruba.
