Un delegacion di Aruba a sali pa St. Maarten pa reunion di Interparlementair Koninkrijksoverleg (IPKO). Alvin Molina ta forma parti di e delegacion aki como miembro di e Comision Fiho di Asuntonan di Reino.
Riba e prome dia, esta diamars 3 di mei, a trata diferente topico di importancia pa cu e islanan Aruba, Corsou y St. Maarten. Topiconan manera introduccion di presidente di parlamento di Aruba y Corsou, presentacion di cada isla riba e situacion di geschillenregeling, trahamento hunto den Reino, discusion riba ley estatal di Caribe, presentacion di delegacion di Sint Eustatius y discusion riba e rapport di racismo entrega door di Sint Maarten. Diferente punto di atencion cu ta regarda e islanan.
Reunionnan di IPKO ta di sumo importancia pa forma union, colaboracion y comprension entre e paisnan den Reino Hulandes. Enfasis di e prome dia ta pa como paisnan di Reino den Caribe nos yega na un consenso con hunto nos lo anda cu topiconan manera debe na Hulanda, recuperacion di nos economia y specialmente mantene autonomia di nos parlamento. E reunion aki yama un tripartite.
E ta custumber cu ta habri reunionnan di IPKO cu un tripartite prome cu bay sinta na mesa cu Hulanda. Asina nos por garantisa un mihor comprondemento entre e islanan di Caribe y tambe por percura pa un reunion mas eficiente na momento cu Hulanda sinta na mesa cu nos.
