Nos economia ta depende grandemente riba turismo. E imagen cu mundo tin di nos pais ta sumanemente importante, manera e siguridad pa pueblo y nos bishitantenan y con nos ta trata nos medio ambiente y nos mascotanan. Un otro punto cu tin influencia riba e opinion cu mundo tin di Aruba ta e manera con nos ta trata esnan cu ta kedando na Aruba sin documentacion legal y / of ta buscando refugio/asilo.
Di mes, estadia ilegal tin su consecuencia riba nos economia y mester wordo combati. Di otro banda esaki no ta wordo considera un infraccion grave pa ley (misdrijf) cu lo haci esunnan envolvi un criminal peligroso. Mayoria hende cu ta kedando ilegal na Aruba ta hende cu ta buscando un manera humilde pa cria nan famia (den exterior). Hopi biaha hasta nan mes ta victima di traficacion di hende. Na prome luga nan ta hende cu merece di wordo trata na un manera humano te ora e momento yega cu kisas nan lo mester regresa nan pais.
Comision di Husticia a ricibi bishita di Amnesty International (AI) cu ta un organisacion mundial cu ta percura pa derechonan humano wordo respeta. Sra. Dagmar Oudshoorn, directora di Amnesty International Hulanda, a duna informacion di un investigacion andando. E investigacion a cuminsa na Curaçao tocante hendenan cu ta drenta e pais y ta keda ilegal of ta buscando refugio. Na Aruba tambe e topico aki ta actual. Puntonan cu ta pone atencion riba dje ta: e derechonan humano, si e proceduranan ta cana bon, si tin acceso na ayudo huridico, si e cuido ta adecua y e trato door di “beveiligers”.
Sra. Oudshoorn a remarca cu e ta experenciando un colaboracion cooperativo y transparente door di instancianan na Aruba manera ministerionan, DIMAS, Guarda Nos Costa (GNC) y VNO. Investigacion ta planea pa keda cla na juni 2023.
