Parlamentario Alan Howell durante tratamento di presupuesto di Pais Aruba den Parlamento a mustra riba e echo cu cosnan na mundo a cambia y situacion na mundo no ta e miho. Esaki a conduci na un dia historico unda un reunion publico pa prome biaha ta wordo hiba sin colega y sin publico presente. E ta considera e situacion actual uno unico unda tur mester mustra nan responsabilidad y sosten, incluyendo parlamentarionan y ministernan.

Teniendo na cuenta e situacion den cual nos pais ta aden, Howell ta considera importante pa rond af e reunion di presupuesto pasobra no tin mucho ora pa discuti riba dje. “Mundo ta den crisis, nos pais ta den crisis. Parlamento y Gobierno mester sa di tuma e miho decisionnan pa salud di nos hendenan pa nos salba nos pais”.

Mas aleu el a bisa cu e ta admira e decisionnan y pasonan firme cu Prome Minister y su Gabinete ta tumando pa nos comunidad y mester ta solidario pa hunto nos por bringa e virus aki cu ta asotando mundo henter. “Full Aruba mester ta solidario pa sali for di e crisis aki, ta importante pa e presupuesto aki pasa cu inicialmente mester a pasa cu un surplus, pero debi na e crisis mester presenta uno cu un deficit, cual ta comprendibel tambe. Den momentonan di crisis nos lo wak e caranan di berdad, awo nos mester para firme y solidario cu otro. Hopi biaha ta facil pa grita cu pueblo mester hala faha mara, cu pueblo mester coopera y pa pueblo carga tur responsabilidad”.

Pesey Alan Howell ta bisa cu ta nos tur tin cu carga e responsabilidad aki, nos tur mester ta uni y solidario, no ta solamente e homber chikito so mester sintie of e mama humilde mester ta preocupa con pa paga su cosnan of entidadnan bancario, comercial of di utilidad.

“Si di berdad nos ta papia cu pueblo mester ta uni, mi ta para cu aki den Parlamento mester mustra pueblo cu nos tambe ta solidario cu nan. Unda e solidaridad ta di nos como representante di pueblo ta? Mi ta kere cu cada 21 parlamentario y tur minister di Gabinete ta lider riba nan mes. Bo mester ‘lead by example’. Nos tur mester contribui y nos tur tin cu sintie.

Pa tal motibo ta gradici Dellanire Maduro, Partido POR y colega independiente Daphne Lejuez pa firma un mocion pa demostra cu nos Parlamento tin nos pais na pecho, cu nos ta solidario cu nos hendenan di berdad. Mi ta kere cu asina aki nos ta mustra e responsabilidad pa pueblo, nos ta demostra asina cu nos ta para banda di nan. Ta keda na cada ken pa demostra nan sano huicio y ta spera di por haya e sosten di mi coleganan”.

E mocion ta pidi pa cada parlamentario cada minister contribui cu mil Florin pa luna for di nan salario pa un periodo di 3 luna (april, mei y juni) cu e fondo di ayudo pa esnan cu a bay atras den nan salario of a perde nan trabou.

Parlamentario Alan Howell ta enfatisa na final cu e ta spera di por conta cu sosten di su coleganan parlamentario pa logra e ayudo aki pa esnan cu mas tin mester. “Nos mester ta uni y mester demostra cu nos t’ey pa nos hendenan, nos mester carga e responsabilidad ey, no solamente como deber, pero como solidaridad y sosten pa nos pueblo”.