ORANJESTAD – Diabierna den reunion publico, Parlamento a trata e tema di desaroyo di Crisis Plan Social.

Parlamentario di POR, Alan Howell a indica durante su disertacionnan cu e problema social ta asina amplio cu tin biaha no sa mes unda pa cuminsa.

Pero cu den e cuadro di busca e miho solucion, pa prome biaha den historia tin un minister cu a sinta diferente departamento hunto pa traha riba un liña y busca e solucionnan. Howell ta bisa “Si for di parlamento y gobierno nos ataca e problemanan aki, nos ta duna e departamentonan un jumpstart grandi pa haci nan trabou na un manera mas profesional, eficiente y exitoso”.

El a duna atencion na e inventarisacion cu a bin ta wordo haci bisando cu awe tin e problemanan preto riba blanco, a cuminsa midi y esaki ta yuda nos sali for di e problemanan. Algo cu ta hopi importante ta pa tin datonan, si no tin esakinan, nos ta leu for di cas, pasobra na final di dia no tin nada pa prueba.

Ta importante pa traha di paden di Parlamento y paden di Gobierno y for di eynan e fruta ta sali bay pa esunnan cu mas tin mester di e yudansa, esta e personanan cu ta sufri di problemanan social. Aki e parlamentario di POR a presenta un punto importante bisando cu ta tur hende tin problema social, pasobra na momento cu un bisiña tin un problema social, tur otro tin tambe problema social y p’esey mester atende cu esakinan conhuntamente.

Un di e puntonan importante cu ta hayando atencion ta e proyecto di Formacion Social y Alan Howell ta contento di mira cu e minister aki a tuma un plan inicia pa gobierno anterior, par’e un rato, traha pa drech’e y inicia cu ne na un forma grandi. “Mi no tin duda cu e lo ta hopi mas exitoso”.

Howell a indica tambe den su disertacion cu na aña 2011, un colega parlamentario cu ta sinta na banda di oposicion awe y cu e tempo ey tabata independiente a presenta un mocion pa e hobennan femenino tambe forma parti di e Formacion Social, pero ningun hende a worry cu e mocion y su lider tampoco a haci caso di e tremendo mocion aki. Mientras tanto e gobernacion cu tin actualmente, si lo bay zorg pa e cosnan cana manera debe ser, segun e parlamentario di POR a duna di conoce.

Teniendo na cuenta esaki, Howell a presenta un mocion den e spirito di e Crisis Social Plan.

E mocion ta bisa lo siguiente:

Considerando cu nos no por desmenti cu nos tin un Crisis Social, cu ultimo añanan ta un echo cu hobennan femenino tambe tin hopi problema social cu ta afecta nan comportacion, cu ta un echo cu ultimo añanan den hopi  bringamento publico na scolnan ta di hobennan femenino, cu a re-inicia cu e programa di Formacion Social pa hobennan masculino, cu tin hopi peticion den nos comunidad pa hobennan femenino por forma parti di e programa di Formacion Social, cu e programa di Formacion Social ta yuda e hobennan cu ta participa den dje pa re-incorpora nan mes positivamente den comunidad cu e posibilidad di haya un bon trabou.

Ta urgi gobierno pa studia profundamente e posibilidad pa mas lihe cu ta posibel laga e hobennan femenino forma parti tambe di e programa di Formacion Social y asina duna e hobennan aki e mesun oportunidad cu e hobennan masculino pa ta un miho ciudadano den nos comunidad y logra haya un bon trabou na beneficio di henter Aruba.

Despues di esaki Alan Howell a expresa cu coalicion lo sigui sostene minister Glembert Croes te unda cu por y a gradici tur 15 parlamentario (MEP,RED,AVP) presente den e reunion como tambe  minister Glenbert Croes pa sostene den gran forma e mocion presenta door di su persona.