Parlamentario Alan Howell ta expresa cu ta increibel pa wak con bunita e bario di Seroe Preto a keda. “Esaki ta loke nos ta yama subi e calidad di bario. E proyecto di asfalta e bario completo di Seroe Preto na San Nicolas a keda cla y den gran forma. Debi cu e bario ta masha grandi mes, DOW a parti e proyecto den 2 fase”.
E ta bisa cu e habitantenan a haci un peticion special na su persona y el a laga su voz resona den Parlamento pa nan. “No ta pornada nos a presupuesta extra placa pa minister di Infrastructura Otmar Oduber por traha cune y cumpli cu pueblo su soño y deseonan”.
Pa hopi tempo pariba di brug su hendenan a wordo neglisha y awo ta ora pa parlamentario Howell para pa nan. Poco, poco tur bario tur rond Aruba y specialmente pariba di brug lo haya su debido atencion. Fraccion di POR kier a gradici minister Otmar Oduber pa scucha nan peticion y DOW pa e tremendo y rapido trabou. “Together We Can Make It Better”, Alan Howell a finalisa
