ORANJESTAD – Parlamentario di partido POR, Alan Howell ta masha contento di mira con otro bario mas di pariba di brug ta bay wak su cayanan asfalta.
E ta bisa cu hopi entusiasmo cu e forsa di pueblo ta den parlamento y cu “durante reunionnan publico den Parlamento, pero tambe den prensa y riba social media mi style ta y lo keda pa lucha pa e bienestar di nos pais, pueblo y specialmente pa e desaroyo pa pariba di brug”.
E parlamentario di e partido blauw ta expresa cu orguyo cu habitantenan di Rooi Master por sinti cu nan tambe ta conta y cu a pesar di un tardansa chikito pa motibonan fuera di alcance di DOW, trabounan pa asfalta e camindanan di santo a cuminsa.
Fraccion di partido POR ta gradici minister Otmar Oduber y DOW pa cumpli cu e deseo y soño di e habitantenan di Rooi Master. “Mas bario pariba di brug coming up next”. Alan Howell a finalisa.
