Alan Howell, parlamentario di fraccion di POR a trece dilanti cu un biaha mas e luznan publico no ta funciona riba caminda di Bernhardstraat. El a bisa cu esaki ta un preocupacion cu ciudadanonan di pariba di brug tin y aparentemente no ta hayando e atencion debido. Si el a expresa cu e luznan aki algun biaha a wordo drecha, pero despues di algun tempo no ta funciona mas.
E situacion cu e falta di luz ta trece cune ta peligroso. Howell ta indica cu e scuridad riba e caminda aki ta trece peliger pa trafico y pa peatonnan, ademas di sentimento di insiguridad pa habitantenan di e zona y p’esey e ta urgi instancianan concerni pa atende cu e situacion aki mas pronto posibel.
Tambe el a dirigi su mes na Minister Otmar Oduber, a puntr’e si e por informa riba e pakico e luznan aki no ta funciona, pakico nan no a wordo drecha y tambe pa ki tempo por spera cu nan lo wordo drecha ‘for once and for all’.
Inclusive e tabatin e sugerencia cu si acaso e luznan aki no ta funciona adecuadamente, pa cambia esakinan pa e ‘palonan di luz crioyo’, esunnan di palo, pasobra e ora por ta sigur cu Elmar por ‘take care’ di e luznan aki, ya cu esunnan cu tin actualmente ta cay bou di DOW y no Elmar.
