Fin di luna pasa durante reunion den sala di Parlamento pa atende e tema di enseñansa, parlamentario Alan Howell a realisa un serie di pregunta na minister di Enseñansa mustrando asina su preocupacion pa cu e situacion reinante.
El a enfoca hopi riba e incertidumbre cu tabata existi pa loke ta e futuro di e scolnan na San Nicolas.
E preguntanan cu Howell a realisa na e mandatario ta: Cuanto maestro ta pro pa Colegio Arubano San Nicolas bay bou de Schakel? Cuanto maestro ta pro pa Abraham de Veer y Pieterboer bay bou SPCOA? Con ta posibel cu un scol cu ta cay bou di un fundacion ta keda cu caracter di un scol publico si gobierno no tin zeggenschap mas eyden? Cua ta e posilibilidad pa Colegio Arubano San Nicolas bay den conhunto cu De Schakel en bes cu e ta cay bou di dje? Resultadonan di Colegio Arubano San Nicolas (68%) y Abraham de Veer (89%) di e aña escolar aki no ta refleha cu e scolnan merece respet pa keda den nan forma actual? Cua ta e posibilidad pa adapta e criterionan pa Colegio Arubano San Nicolas y Abraham de Veer keda existi como DPS mirando cu segun minister pa motibo cu e klasnan ta bira menos e scolnan no ta cumpli cu e criterionan pa nan keda existi? Cua ta e posibilidad pa pone e cambionan presenta ‘on hold’ pa por splica esakinan na tur stakeholdernan y haya nan input riba esakinan? Cuanto di e muchanan cu ta bay Abraham de Veer y Pieterboer ta di religion protestante?
Alan Howell no a keda te eynan, el a sigui e desaroyo di e situacion y a pidi pa San Nicolas keda calmo “I got your back. Kere mi palabra, no ta bay tin cambio den ningun scol na San Nicolas. Sigur cu no, tanten cu maestronan, mayornan, minister y Parlamento ta riba e mesun liña. Dus everybody just stay cool and calm”.
E parlamentario a gradici Prome Minister y Minister di Enseñansa pa trece e seguridad den mundo di enseñansa cu por lo pronto no lo bin cambio, ofreciendo asina e calma necesario den e aspecto aki, specialmente awo cu nos ta den tempo di crisis.
